Media-monitorinq 18.03.2016

Rəsmi qəzetlər ölkənin rəsmi həyatı ilə bağlı yazır, verilmiş əfv fərmanı, ölkənin iqtisadi durumu, geosiyasi vəziyyət müstəqil medianın aparıcı mövzusudur

Bu fərman siyasi məhbus problemini həll etməyib

“Azadlıq” qəzeti dövlət başçısı İlham Əlievin  dünənki əfv fərmanını şərh edib. Qəzet bütünlükdə fərmanı “növbəti yarımçıq əfv” kimi dəyərləndirir. “Beləliklə, bu sərəncam da siyasi məhbus probemini həll etməyib”.

Fərmanda Xalq Cəhbəsi Partiyasından siyasi dustaq olan bir şəxsin belə azad olunmaması hakimiyyətin AXCP-yə xüsusi qərəzi olması kimi şərh edilir və hər ikisi Qarabağ qaziləri olan Asif Ysufli və Qadir Xudabaxışovun azad ediməsinin mümkünülüyü vurğulanır.

Şərhə görə, fərmanla azad edilən 14 dustaq belə rəsmi Bakının siyasi iradəsinin nəticəsi deyil. “Qərbin siyasi məhubsları qeyd-şərtsiz azadlığa buraxmaq tələbi hakimiyyətin demokratik dünyaya savaş açmasına səbəb oldu. Münasibətlər o qədər gərginləşib ki, Azərbaycan hakimiyyətinə sanksiyalar gündəmə gəib. Əslində, 14 siyasi məhbusun buraxılması münasibətləri bir qədər ytumşaltmaq, sanksiya qərarını bir qədər təxirə salmaq məqsədi daşıyır. Lakin, qeyd etdiyimiz kimi, Qərb siyasi məhbusların hamısının azad olunmasını tələb edir”.

Qəzet yazır ki, Beynəlxalq Sülh naminə Karnegi Fondunun əməkdaşı Tomas de Val da bu fərmanı rəsmi Bakının  Nüvə Sammiti ərəfəsində Vaşinqtonu sakitləşdirmək səyi kimi dəyərləndirib. Amma T.de Vall rəsmi Bakını hakimiyyəti tənqid etdiklərinə görə hələ də barmaqlıqlar arxasında qalan adamları yaddan çıxarmamağa çağırıb.

Bakı üzünü Qərbə döndərir

“Novoye Vremya” qəzetində dərc edilən "Bakı üzü Qərbə döndərir” adlı məqalədə Azərbaycanın mövcud beynəlxalq geosiyasi mövqeyi təhlil edilir.

“Azərbaycan “qızıl orta” mövqeyində durmağa üstünlük verir. Bir tərəfdən rəsmi Bakı Rusiyadan asılı olmayan öz enerji layihələrini icra edir, digər tərəfdənsə Kreml administrasiyasının narazılığına səbəb ola biləcək addımlar atmır”. Bu situasiya Azərbaycanda maraqlarını tam təmin etmək istəyən Qərbdə məyusluq yaradır.

Daha sonra məqalədə bununla belə Azərbaycanın Qərbin xeyrinə geosiyasi seçim etmək niyyəti olduğu deyilir. Azərbaycanla Avropa İttifaqı arasında münasibətlərin dinamik inkişaf etdiyi vurğulanır.

“Azərbaycan qarşısına dövlətçiliyi Avropa ilə sıx əməkdaşlıq prinsipi əsasında inkişaf etdirmək məqsədi qoyub və bu istiqamətdə uğurla hərəkət edir. Amma bu münasibətlərdə rəsmi Bakının əsas mövqeyi bərabər, ədalətli, qarşılıqlı hörmət və anlaşmaya nail olmaqdan ibarətdir”. Hətta məqalədə əks halda bu əməkdaşlğı uğurlu belə saymağın mümkünsüzlüyü nəzərə çatdırılır.

Qəzetə görə, son vaxtlar Azərbaycanla Avropa İttifaqı arasında bu yöndə bir anlaşma olduğu görünür və “Şərq Tərəfdaşlığı” proqramı çərçivəsindəki proseslər nəticəsində ölkə öz yolunu müəyyən edib.

Son olaraq, məqalədə ölkə rəhbərliyinin Avropa İttifaqının ayrı-ayrı ranqlı təmsilçilərilə görüşləri, bəyanatları xatırladılır və bütün bu təhlildən sonra qəzet “Gördüyümüz kimi, Azərbaycan Qərbə tərəf gedir” nəitcəsini nəzərə çatdırır.

Ekspert A.Mehdiyev: Hökumətin hazır islahat proqramı yoxdur

“Proqramı belə tez qəbul etmək olmaz, amma cari 2016-cı il üçün qısamüddətli proqram qəbul etmək lazımdır”. Bunu deputat Vahid Əhmədov  dövlət başçısı İlham Əliyevin imzaladığı “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri” sərəncamı ilə bağlı “Yeni Müsavat” qəzetinə şərhində deyib. “Bu ilin proqramı indi qəbul edilməlidir ki, biz iqtisadiyyatı indiki ağır durumdan çıxara bilək və bu mənada mən də vurğulayıram ki, 2016-cı il üçün ayrıca proqram qəbul edilsin”.

Ekspert Azər Mehdiyev hökumətin yalnız indi başlıca istiqamətlər üzrə yol xəritəsi təklif etməsini gecikmiş addım sayır. “Bizim gözləntimiz bundan ibarət idi ki, indiki halda ölkə başçısı bir islahatlar proqramı qəbul edəcək. Ancaq reallıq onu göstərir ki, hazırda hökumətdə belə bir işlənmiş sənəd yoxdur, Hələ bundan sonra bu istiqamətdə işlərə başlanacaq".     

Ekspert diqqəti sənəddə qeyd edilən işçi qrupun 6 ay ərzində diaqnostika aparması, müəyyən strategiya işləməsi, 2020-ci ilə qədərki dövr üçün proqram və s. hazırlanmasına çəkir. “Bu isə onu göstərir ki, bütün hazırlıq işləri hələ bundan sonra görüləcək, təbii ki, bu da ölkə iqtisadiyyatının indiki böhranlı vəziyyətdə olduğu bir dövrdə itirilmiş bir zamandır”.