Bastrıkin Kamran Əliyevə nə deyib? (yeniləndi)

Rusiyanın istintaq orqanları Azərbaycanın AZAL aviaşirkətinə məxsus "Embraer-190" təyyarəsinin qəzaya uğraması ilə bağlı hərtərəfli araşdırma aparır.

Azərbaycan Baş Prokurorluğu bu gün bildirib ki, təyyarənin qəzaya uğramasının səbəbləri və şəraiti, o cümlədən təyyarənin kənar müdaxilə nəticəsində məhv edilməsi versiyası öyrənilir.

Baş prokurorluğun mətbuat xidmətindən verilən məlumata görə, Azərbaycanın baş prokuroru Kamran Əliyev Rusiya Federasiyası İstintaq Komitəsinin rəhbəri Aleksandr Bastrıkinlə telefon danışığı aparıb.

«Rusiya İstintaq Komitəsinin sədri Aleksandr Bastrık Baş prokuror Kamran Əliyevə zəng edərək Rusiyada araşdırılan cinayət işinin tam, hərtərəfli və obyektiv istintaq olunması məqsədilə peşəkar müstəntiq və kriminalistlərdən ibarət istintaq qrupunun yaradıldığını, təyyarənin qəzaya uğramasının kənar müdaxilə nəticəsində baş verməsi daxil olmaqla, hadisənin səbəb və şəraitinin hərtərəfli araşdırıldığını, təqsirkar şəxslərin müəyyən olunaraq cinayət məsuliyyətinə cəlb edilməsi istiqamətində intensiv istintaq-əməliyyat tədbirlərinin davam etdirildiyi barədə məlumat verib», - məlumatda daha sonra bildirilir.

* * *

Rusiya Federasiyası İstintaq Komitəsinin rəhbəri və Azərbaycanın baş prokuroru Aktauda baş vermiş fəlakətin araşdırılmasını müzakirə ediblər

Rusiya İstintaq Komitəsinin  sədri Aleksandr Bastrıkinlə Azərbaycanın baş prokuroru Kamran Əliyev arasında telefon danışığı olub. İstintaq Komitəsinin yaydığı məlumatda deyilir ki, tərəflər “Azərbaycan Hava Yolları”nin təyyarəsinin qəzaya uğramasının səbəblərinin araşdırılmasını müzakirə ediblər.

“Biz Rusiya müstəntiqləri və kriminoloqlarının Azərbaycan və Qazaxıstanın istintaq-əməliyyat qruplarından olan həmkarları ilə hərtərəfli qarşılıqlı fəaliyyətindən danışdıq”, - mesajda deyilir.

Aleksandr Bastrıkin əmin edib ki, Rusiya tərəfində bu işə İstintaq Komitəsinin mərkəzi aparatının təyyarə qəzasının araşdırılması sahəsində ən təcrübəli əməkdaşları cəlb olunub. Onun sözlərinə görə, onlar qəzanın bütün səbəblərini və şəraitini müəyyən etməlidirlər, hesabatda qeyd olunub.