Rusiya Federasiyasının Kursk vilayətində döyüşlər: Ukraynalılar səkkizinci gündür hücum edir

Ukrayna qoşunlarının Rusiyanın Kursk vilayətinə hücumu səkkizinci gündür ki, davam edir. Son məlumatlara görə, Ukraynanın daha iki desant-hücum briqadası - 82-ci və 95-ci briqadalar döyüşə başlayıblar, Forbes yazır.

Bu qüvvələri nəzərə alaraq, Kursk istiqamətindəki Ukrayna korpusuna altı briqada, üstəgəl iki ayrı batalyon və pilotsuz təyyarələrin yardımcı bölmələri, artilleriya, kəşfiyyat və xüsusi təyinatlı qüvvələr daxildir. Ümumilikdə, bu, təxminən 15 minə yaxın hərbçidir", - nəşr bildirir.

Kursk vilayətinə göndərilən briqada və batalyonların bir hissəsi cəbhənin digər hissələrindən köçürülür. Xarici Siyasət Araşdırmaları İnstitutunun analitiki Rob Linin fikrincə, bu, Ukraynanın miqyaslı hədəflərindən, o cümlədən Kursk vilayətində uzunmüddətli qala bilməsindən xəbər verir.

Rusiyalılar doqquz moto-atıcı, desant-hücum alayı və briqadasının qüvvələrilə müdafiə olunurlar ki, bu da potensial olaraq Ukrayna qüvvələrinin sayını üstələyir. Eyni zamanda, Rusiya qoşunları Ukraynanın şərqindəki hücumu dayandırmır, hətta bu sahədə müdafiəni gücləndirir.

Nəşrin yazdığına görə, hər iki tərəfin itkiləri artır, çünki döyüşə yeni qüvvələr girir. Ukraynalılar hələ də üstünlüyə malikdirlər və çox güman ki, Kursk istiqamətindəki Rusiya hərbi komandanlığı ehtiyatların ikinci eşelonunu yerləşdirməli olacaq, çünki birinci eşelonun qoşunları hücumu dayandıra bilməyəcəklər.

Avqustun 6-da Ukrayna Silahlı Qüvvələrinin Rusiyanın Kursk vilayətində əməliyyatı başlayıb. Çərşənbə günü, avqustun 13-də Ukrayna Silahlı Qüvvələrinin baş komandanı Aleksandr Sırski bildirib ki, Kursk vilayətinin 74 yaşayış məntəqəsi və min kvadrat kilometrdən çox ərazi Ukrayna qüvvələrinin nəzarəti altındadır.