Rusiya səfirinə etiraz notası verilib

Bu gün RF səfiri Vladimir Doroxin Azərbaycan XİN-ə dəvət edilib, burada xarici işlər nazirinin müavini Mahmud Məmmədquliyev ona Rusiyanın “RİA-Novosti” dövlət informasiya agentliyinin internet səhifəsində “Dağlıq Qarabağ 25 il ərzində tanınmamağa öyrəşmişdir” başlıqlı məqalənin dərc edilməsi ilə bağlı etiraz notası təqdim edib.

Azərbaycan XİN-in məlumatında deyilir ki, Məmmədquliyev səfirin diqqətinə çatdırıb ki, Azərbaycana qarşı yönəlmiş məlumatların Rusiya KİV-də yayılması hallarının son zamanlar geniş vüsət aldığı müşahidə edilməkdədir. Bu tip informasiyaların ATƏT-in Minsk qrupunun həmsədri olan Rusiyanın Ermənistan-Azərbaycan münaqişəsinin həlli istiqamətindəki fəaliyyətinə kölgə saldığı vurğulanıb.

Məqalədə reallığın əks olunmadığı, separatçılıq və ekstremizmə çağırışların səsləndiyi və ərazi bütövlüyü prinsipinə hörmətsizliyin ifadə olunduğu Rusiya səfirinin diqqətinə çatdırılıb.

Azərbaycan rəsmisi bunun 1997-ci ilin 3 iyul tarixində Rusiya ilə Azərbaycan arasında imzalanmış “Dostluq, əməkdaşlıq və qarşılıqlı təhlükəsizlik haqqında Müqavilə”nin müddəalarına zidd olduğunu xatırladıb.

Rusiyanın dövlət informasiya agentliyinin internet səhifəsində yer almış bu təxribat xarakterli məqalənin Azərbaycan və Rusiya arasında mövcud dostluq və əməkdaşlıq münasibətlərinin ruhuna uyğun olmadığı, sözügedən Müqavilənin məğzinə və müddəalarına zidd olaraq iki ölkə  arasında formalaşmış münasibətlərə xələl yetirdiyi qeyd edilib.

Xatırladaq ki, dünəndən etibarən Azərbaycanın bir sıra hökumətyönlü KİV-ləri “RİA-Novosti”ni tənqid atəşinə tutublar. Lakin Azərbaycan hakimiyyəti özü uzun illər Azərbaycanda bu agentliyə yaşıl işıq göstərib.

Belə ki, bu agentliyin filialı Prezident Administrasiyasının yüksək vəzifəli məmuruna məxsus binada yerləşir.

Bir çox hökumətyönlü KİV-lər bu filialla eyni binada yerləşir. Bir vaxtlar Azərbaycanın dövlət qəzetləri “RİA-Novosti”nin məlumatlarına bütöv səhifə ayırırdılar, bu da humanitar sahədə uğurlu əməkdaşlığın təzahürü kimi təqdim edilirdi. -16D-