Rusiya Vaqner qrupu vasitəsilə "Hizbullah"a RƏM sistemləri verməyə hazırlaşır

Bakı/22.11.23/Turan: Vaqner qrupuna üzv olan Rusiya muzdluları Moskvanın sərəncamı ilə "ya "Hizbullah"a, ya da İrana" RƏM sistemi verməyə hazırlaşırlar, bu barədə ABŞ administrasiyası bildirib. 

Milli Təhlükəsizlik Şurasının üzvü Con Kirbi jurnalistlərə bildirib ki, Vaşinqton "sabitliyi pozan" bu addımlarda iştirak edə biləcək Rusiyalı fiziki və hüquqi şəxslərə qarşı antiterror sanksiyaları tətbiq etməyə hazırdır. 

"Biz Vaqnerin "Hizbullah" və ya İrana hərbi texnika tədarükünü diqqətlə izləyəcəyik", deyə Kirbi qeyd edib. 

Çərşənbə axşamı brifinqdə Turan-ın Vaşinqtonun Vaqneri terror təşkilatı elan edib-etməyəcəyi haqqında sualına cavabda Dövlət Departamentinin nümayəndəsi Metyu Miller bildirib ki, ABŞ Vaqneri məsuliyyətə cəlb etmək üçün addımlar atıb. 

Kirbi brifinqdə həmçinin bildirib ki, Vaşinqton İranın Ukraynaya qarşı müharibə üçün Rusiyaya "çox sayda" dron, idarə olunan aviabomba və artilleriya silahları tədarük etdiyindən xəbərdardır. Bu dəstəyin müqabilində "Rusiya Tehrana müdafiə sahəsində, o cümlədən raket istehsalı, elektronika və hava hücumundan müdafiə sahəsində misli görünməmiş əməkdaşlıq təklif edir". 

O, həmçinin bu əməkdaşlığın "Hizbullah"a da şamil oluna biləcəyi haqqında kəşfiyyat məlumatlarına malik olduğunu qeyd edib. 0