Rusiya Zmeinıy adasına nəzarəti itirib

Bakı/30.06.22/Turan: Gecə Ukrayna qoşunları Zmeinıy adasına zərbə endiriblər, bundan sonra rus işğalçılar, çox güman ki, adanı tərk ediblər. Bu barədə Ukraynanın "Pivden" operativ komandanlığının Facebook-dakı səhifəsində yer alan məlumatda deyilir. 

"Gecə ərzində hərbi əməliyyatımızın uğurla həyata keçirilən növbəti mərhələsi - raket və artilleriya bölmələrimizin Zmeinıy adasına odlu zərbələr endirməsi nəticəsində düşmən iki sürətli qayıqla qalan qarnizonu tələsik təxliyə edib və çox güman ki, adanı tərk edib", deyə məlumatda bildirilir.

Rusiya tərəfi Zmeinıy adasını tərk etdiyini təsdiq edib.

Rusiya qoşunları Zmeinıy adasında xüsusi əməliyyat tapşırıqlarını yerinə yetiriblər, bu səbəbdən "xoş məram əlaməti olaraq" Rusiya Federasiyası Silahlı Qüvvələri qarnizonunun adadan çıxarılması haqqında qərar qəbul edilib. Bu barədə jurnalistlərə Rusiya Müdafiə Nazirliyinin rəsmi nümayəndəsi general-leytenant İqor Konaşenkov bildirib.

Onun sözlərinə görə, bu yolla dünya ictimaiyyətinə Rusiyanın BMT-nin Ukraynadan kənd təsərrüfatı məhsullarının ixracı üçün himanitar dəhliz təşkil etmək fəaliyyətinə mane olmadığı nümayiş etdirilib.

Zmeinıy adasının itirilməsi Rusiya Qaradəniz donanmasının imkanlarını ciddi şəkildə məhdudlaşdıracaq və praktiki olaraq, dənizdən Ukrayna sahilinə hücum təhlükəsini aradan qaldırır. 06В