Sabir Rüstəmxanlı: Bu Erdoğan iqtidarına cavab idi

Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı Türkiyədə baş verən aksiyaları təkcə təbiətin müdafiəsi yox, mövcud iqtidara narazılığın ifadəsi kimi dəyərləndirib. 

Hazırda Türkiyədə olduğunu deyən S.Rüstəmxanlı prosesi canlı izlədiyini deyib və bunu xalqın ayağa qalxması kimi şərh edib. Aksiyalarda daha çox gənclərin üstünlük təşkil etdiyi nəzərə çatdırılıb və bu, gənclərin ölkədə gedən proseslərə etirazı kimi dəyərləndirilib. İlkin baxışdan aksiya vətəndaşların ekoloji duruma etirazı kimi qavranılsa da, sonra daha geniş kütlələr prosesə qoşulub. Onun fikrincə, rəsmi Ankaranın aksiyaya həqarətlə yanaşması, millətə qarşı saymazlığı bütün Türkiyəni ayağa qaldırıb. Aksiyaların təbiəti qorumaq səviyyəsindən çıxdığı və iqtidara qarşı yönəlməsinə diqqət çəkilib.

S.Rüstəmxanlı İstanbulda başlanan etirazın Azərbaycana təsir edəcəyi proqnozu verib. Onun fikrincə, etiraz dalğasının qarşısını almaq mümkün olmayacaq.

O, bu etiraz dalğasının təkcə Azərbaycana yox, bütün qonşu ölkələrə öz təsirini göstərə biləcəyini söyləyib. Türkiyədə baş verən olayların kənardan təbiəti müdafiə kimi görünməsinə deputat prosesin heç də göründüyü kimi olmamasına diqqət çəkib. S.Rüstəmxanlı Türkiyədə kütləvi aksiya mühitinin çoxdan yetişdiyini deyib. Vətəndaşların iqtidardan narazılığın, aqresiyasının bu şəkildə özünü nə vaxtsa göstərəcyinin gözlənilən olduğunu söyləyib. VHP sədri aksiyanı türk insanının iqtidara cavabı və millətin iradəsini qırmağın mümkünsüzlüyünün göstəricisi kimi şərh edib. -05B-