İlqar Məmmədovun vəziyyəti sabitləşib

Mayın 30-dan etibarən Bakı İstintaq Təcridxanasında karserdə saxlanılan ReAl hərəkatının lideri İlqar Məmmədovun vəziyyəti sabitləşib.

Bazar ertəsi vəkil – Xalid Bağırov ona baş çəkib.

Məmmədov karserə salındıqdan sonra ac qalıb, çünki ona ev yeməyi ötürməyiblər, həbsxana yeməyindən isə imtina edib.

Bağırov bildirib ki, karserdə kamera yoldaşları yeməklərini Məmmədovla paylaşıb və onun vəziyyəti bir qədər yaxşılaşıb.

Öz növbəsində Penitensiar Xidmətin ictimai əlaqələr şöbəsinin rəisi Mehman Sadıqov Turan-a bildirib ki, karserdə saxlanılanlara göndəriş və ərzaq düşmür. Onun sözlərinə görə, Məmmədov ac qalmır və onun vəziyyəti normaldır.

Xatırladaq ki, İlqar Məmmədov İsmayıllıda 23-24 yanvar iğtişaşlarının təşkilində ittiham olunaraq həbs edilib. İctimaiyyət onu vicdan məhbusu hesab edir.

Avropa İnsan Hüquqları Məhkəməsi Məmmədovun şikayətini növbədənkənar icraata qəbul edib. -16B06-