Alman Marşal Fondunun bəyanatı

Haqqın.az saytı Marşal Fondunun (German Marshall Fund) Ankara ofisinin direktoru Özgür Ünlühisarcıklıdan 24 May 2013-ci ildə müsahibə alıb. Müsahibə və guya onun əsasında yazılmış “analiz” haqqin.az–da dərc edilib. 

Hər iki yazıda müəlliflər Ünlühisarcıklının dediklərini yanlış təqdim etmək və sitatlarını təhrif etməklə yanaşı, həm də yazılarına və başlıqlara tamamilə qondarma detallar əlavə ediblər. GMF bunu jurnalistikanın əsas standartları ilə bir araya sığmadığını bəyan edir və öz təşkilatının və işçilərinin nüfuzuna xələl gətirmək çəhdi kimi pisləyir. GMF Azərbaycanda demokratik təsisatların inkişafının və söz azadlığının fəal tərəfdarı olmaqda qalır. Bu barədə Fondun bəyanatında deyilir. 

Öz növbəsində, saytın redaktoru Eynulla Fətullayev bu məsələ ilə bağlı Turan agentliyinə bildirib:

“Mayın 24-də bizim saytın müxbiri Zaur Rəsulzadə Marşal Fondunun  regional direktoru Özgür Ünlühisarcıklıdan müsahibə alıb. Jurnalistin Əsəd rejimi ilə MDB ölkələrindəki, o cümlədən Azərbaycandakı rejimlər arasında bənzərlik görürsünüzmü? – sualına cavabda Türkiyəli ekspert deyib: bəli, bu bənzər rejimlərdir.

Mən redaktorun saytı olaraq, ekspertin müxbirimizə dediyi bu sözlərdən irəli gələrək, bu materiala “Amerika fondunun rəhbəri Əliyev rejimini Əsəd rejimiilə müqayisə etdi” başlığını verdim. 

Bu materialı dərc etdikdən iki saat sonra Türkiyəli ekspert redaksiyaya zəng etdi və məndən müsahibənin başlığını dəyişdirməyi xahiş etdi. Mən onun bu xahişinə rədd cavabı verdim, çünki jurnalist azadlığı prinsipindən irəli gələrək, başlıqları özüm seçməkdə sərbəstəm, bu halda da başlıq müsahibəyə uyğun idi.

Elə həmin axşam Türkiyəli ekspert məni görüşə dəvət etdi. Zaur Rəsulzadə ilə birlikdə əlimizdə diktafonla görüşə getdik, söhbəti lentə aldıq. Audioyazıda onun rejimləri eyni adlandırdığı (aynı rejimler) açıq-aydın eşidilir. Ekspert məndən materialı saytdan çıxarmağı istədi, belə ki, Fondun Azərbaycanda gələcək fəaliyyəti üçün narahatdır. Mən materialı saytdan çıxardım, amma növbəti gün o yenidən zəng edərək, materialı arxivdən silməyi istədi, buna etiraz etdim. Ona dedim ki, yeni müsahibə vermək istəyirsə, saytda yer ayırmağa hazıram, o, əvvəlki fikirlərini təkzib edə bilər", deyə Fətullayev bildirib. -02D-