Saxlanılan jurnalist qaçaqmalçılıqda və silah saxlamaqda ittiham olunur

Sentyabrın 16-da saxlanılan Pərviz Həşimliyə qarşı CM-in 206.3.2 (qaçaqmalçılıq) və  228.2.1.  (qanunsuz silahın əldə olunması, ötürülməsi, satışı, saxlanması, daşınması və gəzdirilməsi) maddələri ilə cinayət işi qaldırılıb. 

“Bizim yol” qəzetinin əməkdaşlarından biri Turan-a bildirib ki, P.Həşimli sentyabrın 16-da axşam direktoru olduğu moderator.az saytının ofisində MTN əməkdaşları tərəfindən saxlanılıb. Eyni zamanda MTN əməkdaşları axtarış aparmaq üçün onun Biləcəri qəsəbəsindəki evinə və “Bizim yol” qəzetinin redaksiyasına gediblər.

“Bizim yol” qəzetinin redaksiyasında olanlara otağı tərk etmək və telefon zənglərinə cavab vermək qadağan olunub.

Operativ tədbirlərlə əlaqədar P.Həşimli də redaksiyaya aparılıb. O, həmkarlarına deyib ki, vaxtilə hansısa adama oğlunun ali məktəbə uğurla imtahan verməsinə yardım edib. Guya həmin kişinin maşınından İran qəzetinə bükülmüş tapança tapılıb. 

“Bizim yol” qəzetində axtarış zamanı qanunazidd heç bir şey aşkar edilməyib. 

P.Həşimlinin doğmalarının sözlərinə görə, MTN əməkdaşları jurnalistin evində tapança tapıblar. Lakin onlar bildiriblər ki, silahı evi axtaranlar özləri qoyublar.

P.Həşimli  Vətəndaşların Siyasi və Mülki Hüquqlarının Müdafiəsi İctimai Birliyinin rəhbəridir. 

İrəli sürülən ittihamlar üzrə P.Həşimlini 8 ilədək azadlıqdan məhrumetmə cəzası gözləyə bilər.  

Sentyabrın 18-də P.Həşimlinin məhkəmə qarşısında dayanacağı və onun barəsində həbs qətimkan tədbirinin seçiləcəyi gözlənilir.

*   *   *

“Bizim yol” qəzetinin əməkdaşı Pərviz Həşimli saxlanılıb. Bu barədə jurnalistin həmkarları sosial şəbəkələrdə məlumat veriblər. Mənbənin məlumatına görə, P.Həşimli çərşənbə axşamı Biləcəri qəsəbəsindəki evinin yaxınlığında MTN əməkdaşları tərəfindən saxlanılıb.

Evdə axtarış zamanı guya silah və hərbi sursat tapılıb.

Çərşənbə axşamı “Bizim yol” qəzetinin  redaksiyasında da axtarış aparılıb. 

Qəzet rəhbərliyi və əməkdaşlar zənglərə cavab vermir. Həmçinin P.Həşimli moderator.az saytının direktorudur. 

P.Həşimlinin saxlanması ilə bağlı hüquq-mühafizə orqanlarından şərh almaq mümkün olmayıb.—06D--