Seçki ilə bağlı İran da bizi bəyənmir

İranın “arannyus” xəbər portalı Azərbaycanda seçkilərə tənqidi mövqe ilə çıxış edib.

  Müəlliflər İrandakı prezident seçkilərində yaşanan canlılıq və hərəkətliliyin Azərbaycanda heç zaman müşahidə olunmamasına diqqət çəkirlər. Bunun səbəbi kimi Azərbaycan xalqının seçki sisteminə inanmaması göstərilir. Müəlliflərə görə, xalq seçkinin nəticələrinin necə olacağını öncədən bildiyi üçün hərəkətlilik  göstərmir.

  Müəlliflərə görə, rəsmi Bakı iki il öncə Konstitusiyaya üçüncü dəfə seçkilərdə iştirak etmək müddəası salmasaydı xalq arasında canlanma ola biləcəyi proqnozunu verir. Onlara görə, indi xalq bu dəyişikliklə İlham Əliyevin iqtidarının ömrünü uzatdığını, bu tezliklə iqtidar olmaqdan əl çəkməyəcəyini, seçkilərinsə bu ölkədə demokratiya iddiası və gözdən pərdə asmaq olduğunu qeyd edirlər.

  Seçkiyə toxunan agentlik İranda səsvermə başa çatana qədər heç kim seçkinin nəticəsini bilə bilmədiyini deyir. Namizədlərin bərabər və ədalətli şəkildə milli tele-radiodan pulsuz istifadə etmələrinə diqqət çəkir.     

 Azərbaycanda isə iqtidarın müxalif namizədlərə kifayət qədər məhdudiyyətlər qoyduğu, hakim partiya ilə bərabər şəkildə mübarizə imkanlarından məhrum edildikləri önə çəkilir. Müxalif partiya və qurumların birliyi olan Milli Şuranın yaradılmasına baxmayaraq, İ.Əliyevin qalib gələcəyinə ekspertlərin şübhə etməmələri iddia edilir.

  İran portalı Azərbaycan xalqını və müsəlman olmasını da unutmur. Ölkə əhalisinin müsəlmanlar olmasına baxmayaraq, islamçıların prezidentliyə namizədlik hüququnun olmamasına toxunulur. Halbuki, İslam Partiyasının həbsdə olan sədri və prezidentliyə namizədi Mövsüm Səmədovun dəstəklənməsi üçün 120000 (yüz iyirmi min) imza toplandığı xatırladılır.

  Nəticə olaraq xəbər portalı bu baxımdan Azərbaycan müsəlmanlarına İranda prezident seçkilərləri ilə bağlı Azərbaycandakı seçkiləri müqayisə edə bilmək təklifi səsləndirir.-05D-