Səfər Əbiyev ATƏT-in mənfi rolu haqqında

Müdafiə naziri Səfər Əbiyev bu gün ABŞ-ın Azərbaycandakı səfiri Riçard Morninqstarla görüşüb.

Müdafiə Nazirliyinin mətbuat xidmətinin yaydığı məlumata görə, ikitərəfli münasibətlər məsələləri müzakirə olunub. Əbiyev deyib ki, 907-ci düzəliş əngəl rolu oynamağa davam edir, onun təşəbbüskarları isə bu gün də “Azərbaycanı hədəfdə saxlayı”.

Daha sonra Əbiyev səfirə 9 oktyabr prezident seçkilərinin demokratikliyindən və ATƏT DTİHB-nin mənfi və qeyri-obyektiv rolundan danışıb.

O, ABŞ Dövlət Departamentinin seçkilər haqqında qiymətləndirmələrini də qeyri-obyektiv adlandırıb və bununla bağlı narahatlığını bildirib.

Mülahizələrinə davam edən Əbiyev 2008-ci ildə Ermənistanda keçirilən seçkiləri xatırladıb, orada kütləvi iğtişaşlara baxmayaraq, ABŞ və ATƏT müsbət rəy verib Ermənistan rəhbərliyinə heç bir təzyiq göstərilməyib.

Müdafiə Nazirliyinin mətbuat xidmətinin versiyasına görə, Morninqstar bütün bunlarla razılaşaraq, Konqresin Azadlıq Aktına 907-ci düzəlişinə yenidən baxılması zərurətini qeyd edib.

Azərbaycanda keçirilən seçkilərə toxunan səfir deyib ki, seçkilər artıq arxada qalıb, İlham Əliyev isə qalibdir. Səslənən tənqidə gəlincə, o, seçkilərin nəticələrinə təsir etməyəcək.

Qeyd edək ki, ABŞ səfirliyi bu görüş haqqında press-reliz yaymayıb və Müdafiə Nazirliyinin məlumatı ilə bağlı şərh verməyib. -02D-