Cəmil Həsənli səlahiyyətli nümayəndəsinin saxlanılmasını iqtidarın seçki saxtakarlığının davamı adlandırıb

“Baş vermiş qanunsuz hərəkətləri, Gülağa Aslanlıya qarşı təzyiqləri qətiyyətlə pisləyir, 9 oktyabr prezident seçkiləri ilə bağlı seçki saxtakarlığını özündə ehtiva edən sənədlərin Mərkəzi Seçki Komissiyası (MSK) tərəfindən obyektiv və şəffaf şəkildə araşdırılmasını, seçkilərin nəticələrinin ləğv olunmasını, ölkədə yeni, ədalətli və azad seçkilərin keçirilməsini bir daha tələb edirəm”. Bu barədə Milli Şuranın prezidentliyə namizədi Cəmil Həsənlinin səlahiyyətli nümayəndəsi Gülağa Aslanlının oktyabrın 13-də MSK-da Cəmil Həsənlinin seçki şikayətləri baxılan anda polis tərəfindən saxlanması ilə bağlı bəyanatında deyilir. 

Sənəddə deyilir ki, son illərin ən böyük total seçki saxtakarlığını həyata keçirən mövcud hakimiyyət bu addımı ilə saxtakar və qanunsuz əməllərini davam etdirdiyini bir daha ortaya qoyub. 

Oktyabrın 13-də MSK-da Cəmil Həsənlinin seçki saxtakarlıqları ilə bağlı şikayəti müzakirəyə çıxarılan zaman  Gülağa Aslanlı polis tərəfindən saxlanılıb. “G.Aslanlı polis bölməsində saxlanılan zaman MSK-da bizim şikayətimiz müzakirəyə çıxarılıb və guya G.Aslanlı ilə əlaqə saxlanıldığı, onun isə sənədlərin əslini verməkdən, MSK-nın yığıncağında iştirak etməkdən imtina etdiyi haqqında yalan məlumatlar verilib və bizim təqdim etdiyimiz şikayət təmin olunmayıb.Yalnız MSK-nın yığıncağı bitdikdən və şikaəyətimiz təmin edilmədikdən sonra  G.Aslanlı sərbəst buraxılıb”, - deyə Həsənli bildirir.-03D-