Şəkidə iki AXCP fəalı saxlanıb

AXCP Gənclər Komitəsinin Şəki şöbəsinin üzvü Vüqar Rzayev və gozetci.az saytının əməkdaşı, həbsdə olan Anar Məmmədlinin rəhbəri olduğu Seçkilərin Monitorinqi və Demokratiyanın Tədrisi mərkəzinin yerli koordinatoru Razim Rzayev sentyabrın 17-də saat 14 radələrində yerli polis tərəfindən saxlanıb.

AXCP-nin Şəki rayon şöbəsinin sədri Əli Abdullayev Turan-a bildirib ki, fəallar artıq 3 saatdır Şəki rayon Polis Şöbəsində saxlanılır. Onlara qarşı İnzibati Xətalar Məcəlləsinin  298.2-ci maddəsi ilə  (yeri, vaxtı, küçə yürüşünə münasibətdə marşrutu qanunla müəyyən edilmiş qaydada razılaşdırılmamış toplantıda iştirak etmə-beş yüz manatdan min manatadək miqdarda cərimə, xətanı törədənin şəxsiyyəti nəzərə alınmaqla yüz altmış saatdan iki yüz saatadək ictimai işlər və ya on beş günədək inzibati həbs) protokol tərtib edilib.

Fəalların məhkəmə qarşısına çıxarılacağı gözlənilir.

Ə.Abdullayev dediyinə görə, saxlanılanları bir ay əvvəl hüquq müdafiəçisi Rəsul Cəfərovun ad günü münasibətilə Şəkidə keçmiş zamanlarda həbs olunan insanların saxlandığı qalanın binası qarşısında keçirilən flaş-mobun iştirakçıları olub.

Belə ki, avqustun 17-də AXCP Şəki rayon şöbəsi həbsdə olan hüquq müdafiəçisi Rəsul Cəfərovun doğum günü münasibətilə flaş-mob keçirib. Bundan sonra flaş-mobda iştirak edən AXCP Şəki şöbəsinin sədri Əli Abdullayev və rayon təşkilatının Ali Məclisinin sədri Rauf Abdürrəhmanlı inzibati qaydada 5 sutka həbs edilib, məclis üzvü Mübariz Əbdülkərimov və Gənclər Komitəsinin sədri İslam Həsənov 500 manat cərimələnib. -03B-