Sentyabrın 20-də Azərbaycanda Dövlət Suverenlik Günü qeyd olunur

Bu gün Qarabağda Azərbaycan ərazilərinin tamamən işğaldan azad edilməsilə nəticələnən  hərbi əməliyyatın keçirilməsindən bir il ötür.

Bir sutkadan az davam edən hərbi əməliyyatlar zamanı erməni hərbi qüvvələrinin qalıqlarına sarsıdıcı zərbə endirilib.

Tamamilə darmadağın olmamaq üçün onlar silahlarını yerə qoyub bölgəni tərk etdilər. Separatçı rejim süqut etdi. Onun  müharibə cinayətlərində əli olan hazırkı və keçmiş liderləri həbs edildi.

23 saatlıq əməliyyat 1990-cı illərin əvvəllərində Ermənistanın işğalından sonra uzun illər  münaqişə predmeti olan ərazilər üzərində Azərbaycanın Konstitusiyasının və tam nəzarətinin bərpası ilə nəticələndi.

1990-cı illərin əvvəlində münaqişə zamanı Ermənistan Azərbaycanın beynəlxalq səviyyədə tanınmış ərazisinin, o cümlədən keçmiş Dağlıq Qarabağ regionunun 20 faizini işğal etmişdi ki, bu da azərbaycanlıların genişmiqyaslı etnik təmizlənməsinə səbəb olmuşdu və Xocalı qətliamında kulminasiya nöqtəsinə çatmışdı.

2020-ci ildə Qarabağ müharibəsi (həmçinin 44 günlük müharibə kimi tanınır) Azərbaycanın öz  torpaqlarının böyük hissəsini geri almasına gətirib çıxardı. 19-20 sentyabr 2023-cü il tarixli əməliyyatlar isə Azərbaycan ərazilərinin tamamən işğaldan azad edilməsilə nəticələndi.

Azərbaycanın ərazi bütövlüyünün bərpası münasibətilə prezident İlham Əliyev 20 sentyabrın Dövlət Suverenlik Günü kimi elan edilməsi haqqında fərman imzalayıb.