Sərdar Əlibəyli İsa Sadıqovun müraciətini dərc etdiyinə görə cəzalandırılıb?

 “P.S Nota” qəzetinin və portalının redaktoru Sərdar Əlibəylinin həbsi əsassızdır və siyasi motivlidir. Bu gün Media Mərkəzində keçirilən mətbuat konfransının mahiyyəti belə olub. Tədbiri hüquq müdafiəçisi Vidadi İsgəndərli təşkil və iki vəkil – Elçin Sadıqov və Samir İsayev təşkil edib Onlar həbsin qanunsuz olduğunu, kobud prosessual pozuntuların olduğunu, işin sifariş xarakterli olduğunu deyiblər.

S.Əlibəyli 221.3-cü maddə (silah və əşyalardan istifadə olunmaqla xuliqanlıq) üzrə ittiham olunur. Maddə 3 ildən 7 ilədək azadlıqdan məhrumetməni nəzərdə tutur.

İş materiallarına görə, S.Əlibəyli iyulun 29-da axşam saat 21:00-a yaxın Xətai rayonunun ərazisindəki 260 saylı məktəbin yaxınlığında Namiq Əmirov adlı şəxslə mübahisə edib. Dava zamanı S.Əlibəyli N.Əmirovu daşla vurub.

İyulun 31-də S.Əlibəyli polisə çağırılmadan çayxanada həbs edilib. Mülki geyimli şəxslər onu çağıraraq polisə getməli olduğunu bildiriblər. S.Əlibəyli polisə rəsmi çağırışın olmasını tələb edib. Lakin onun qolunu buraraq zorla maşına əyləşdiriblər. Hazırda o, Kürdəxanıda istintaq təcridxanasında saxlanılır.

Vəkil S.İsayev bildirib ki, müdafiə tərəfi Xətai məhkəməsində həbsdən şikayət verib. Vəkillər onun barəsində həbs qətimkan tədbirinin dəyişdirilməsini xahiş ediblər, çünki o, cəmiyyətə təhlükə törətmir və himayəsində əlil oğlu var. Lakin Xətai məhkəməsi vəsatəti təmin etməyib və müdafiə tərəfi apellyasiya verəcək.

Vəkilin sözlərinə görə, S.Əlibəyli istintaqa ifadə vermir. O dəfələrlə bildirib ki, N.Əmirov adında adam tanımır və onunla dalaşmayıb.

V.İsgəndərli qeyd edib ki, həbs siyasi motivlidir, səbəbi isə qəzetdə siyasi mühacir, polkovnik İsa Sadıqovun müraciətinin dərc edilməsidir.-04S-