Sergey Lavrov ATƏT-in Minsk Qrupunun həmsədrləri ilə görüş keçirib

Bakı/19.11.20/Turan: Rusiyanın xarici işlər naziri Sergey Lavrov noyabrın 18-də Moskvada Dağlıq Qarabağ nizamlanması üzrə ATƏT-in Minsk Qrupunun həmsədrləri İ.Popov (Rusiya), S.Viskonti (Fransa), E.Şefer (ABŞ), habelə ATƏT-in fəaliyyətdə olan sədrinin şəxsi nümayəndəsi A.Kasprşiki qəbul edib.

Məsləhətləşmələr zamanı Azərbaycan Respublikasının prezidenti, Ermənistan Respublikasının baş naziri və Rusiya Federasiyasının prezidentinin cari il noyabrın 9-dan etibarən atəşkəs və bütün hərbi əməliyyatların dayandırılması haqqında Bəyanatından sonra Dağlıq Qarabağ və onun ətrafında yaranmış vəziyyət müzakirə olunub, bu barədə RF XİN-in mətbuat xidmətinin məlumatında deyilir.

Üç ölkənin bundan sonrakı vasitəçilik səylərinin əlaqələndirilməsi məsələlərinə baxılıb, deyə məlumatda qeyd edilir.

Görüşlə bağlı ətraflı məlumat verilmir. Həmsədrlər görüşün yekunları ilə bağlı bəyanat yaymayıblar. Bakı da görüşün yekunlarını şərh etmir.

Xatırladaq ki, Vaşinqton və Paris faktiki olaraq 9 noyabr tarixli Bəyanatın müddəalarına yenidən baxmağa çağırıblar, Qarabağda münaqişənin nizamlanmasında tək vasitəçi rolunu üzərinə götürən Moskvanın birtərəfli addımlarından narazılıqlarını bildiriblər. -06D-