Serjik Azərbaycanın 30%-ni işğal etməklə hədələyir

Yerevan/03.10.13/Turan-Armİnfo: “Azərbaycan Artsaxa qarşı döyüş əməliyyatlarına başlasa, Ermənistan bütün hərbi qüvvələri ilə onu müdafiə edəcək”, deyə Ermənistan prezidenti Serj Sarkisyan dünən Strasburqda ATƏT-in sessiyasında çıxış edərkən bildirib.

“Hərbi əməliyyatlara başlayıb, sonra işğaldan şikayət etmək lazım deyildi. İndi də Azərbaycan hakimiyyəti bizi hərbi əməliyyatlarla hədələyir. Lakin əminəm ki, hərbi əməliyyatlar başlasa, bir neçə ay sonra Azərbaycanlılar 20 deyil, 25, 30% işğaldan danışacaqlar. Sadəcə olaraq hərbi əməliyyatlara başlamaq lazım deyil”, deyə Sarkisyan Azərbaycanlı deputat Səməd Seyidovun Ermənistanın Azərbaycan ərazilərinin 20%-ni işğal etməsi ilə bağlı ittihamlarına cavabda bildirib.

Azərbaycan prezidenti İlham Əliyev öz bəyanatlarında müharibə ilə hədələməkdə, erməniləri bir nömrəli düşmən adlandırmaqda, silahların artırılması və silahlanmanın davam etməsi ilə qürur duymaqda davam edir.

Lakin Azərbaycan xalqının böyük hissəsi ölkə rəhbərliyinin hərbi baxışlarına şərik deyil, deyə Sarkisyan bildirib.

Prezident həmçinin beynəlxalq ictimaiyyəti və AŞPA-nı hakimiyyəti müntəzəm olaraq münaqişəni hərbi yolla həll etməklə hədələyən Azərbaycana üzərinə götürdüyü beynəlxalq öhdəlikləri yerinə yetirməsi üçün təzyiq göstərməyə çağırıb. “AŞPA Azərbaycanın öz öhdəliklərinə sadiq olub-olmaması məsələsini qaldırmalıdır. Sadiq deyilsə qərar qəbul edilməlidir. Sadiqdirsə, öhdəlikləri yerinə yetirməlidir”, deyə Sarkisyan qeyd edib. -02D-