Serjik şərt irəli sürmək fikrindən daşınıb və Əliyevlə görüşə gedir

Şənbə günü Ermənistan prezidentinin administrasiyası Serj Sarkisyanın ATƏT-in Minsk Qrupu həmsədrlərinin Ermənistan və Azərbaycan prezidentlərinin görüşünü təşkil etməyi planlaşdırdığı Vyanaya səfər edəcəyini təsdiq edib.

“Ermənistan prezidenti Serj Sarkisyan mayın 16-da Avstriyaya işgüzar səfərə gedəcək. Vyanada Ermənistan dövlət başçısının Qarabağ tənzimlənməsi üzrə ATƏT-in Minsk Qrupunun həmsədrlərinin təşəbbüsü ilə bir sıra işgüzar görüşləri gözlənilir”, deyə Ermənistan dövlət başçısının mətbuat xidməti məlumat yayıb.

Xatırladaq ki, ATƏT MQ həmsədrləri cümə axşamı Ermənistan və Azərbaycan prezidentlərini Dağlıq Qarabağda vəziyyəti müzakirə etmək üçün dərhal görüşməyə çağırıblar və gələn həftə Vyanada görüş keçirməyə hazır olduqlarını bildiriblər.

Bundan sonra Rusiya, ABŞ və Fransa XİN rəhbərləri görüşdə iştirak edəcəklərini bəyan ediblər.

Bu günə qədər rəsmi Yerevan və Ermənistan prezidenti özü dəfələrlə bildirib ki, üç şərt təmin edilməsə: cəbhə xəttində təhlükəsizlik təmin edilməsə, etimad tədbirləri işlənib hazırlanmasa və cəbhə xəttində pozuntulara nəzarət sistemi işlənib hazırlanmasa görüşməyəcək və tənzimləmə üzrə danışıqlar aparmayacaq. Bu şərtlər aprelin əvvəllərində Azərbaycan ordusunun Qarabağ cəbhəsinin şimal və cənub hissələrində ərazilərinin bir hissəsini azad etməsi ilə nəticələnən döyüşlərin dayandırılmasından sonra irəli sürülüb.

İndi isə Serjik tələblərini “unudub”.

Rəsmi Bakı hələlik Vyanadakı görüşlə bağlı bəyanat verməyib. -02D-