Sevinc Babayevanın İstanbulda müəmmalı ölümü

İstanbuldakı Medicana Hospital klinikası Azərbaycan vətəndaşı Sevinc Babayevanın ölməsi barədə dünəndən yayılan məlumatı təsdiqləyib. S.Babayev Azərbaycan Beynəlxalq  Universitetinin keçmiş rektoru Elşad Abdullayevin İnternetdə yerləşdirdiyi qalmaqallı videoçarxlarda əsas fiqurlardan biridir. 

Xəstəxanadan Turan-ın müxbirinə S.Babayevanın ölümünün səbəblərini açıqlamayaraq bunu qohumlarının tələbi ilə əsaslandırıblar. Klinikadan Azərbaycanın İstanbuldakı Baş Konsulluğuna müraciət etməyi tövsiyə ediblər. Lakin orada telefon zənglərinə cavab verən olmayıb.

Sentyabrın 25-də E.Abdullayevin yayımladığı videoda S.Babayeva keçmiş deputat Elşad Abdullayevlə onun 2005-ci il parlament seçkilərində deputat seçilməsi üçün rüşvətin məbləğini müzakirə edirlər. 

Bu video yayımlandıqdan üç gün sonra hakimiyyət “dələduzluq” maddəsi üzrə cinayət işi qaldırıb. Lakin nə S.Babayeva, nə də G.Əhmədova saxlanılmayıb. Üstəlik, məlum olub ki,  S.Babayeva Türkiyəyə qaçıb.

İki həftə əvvəl yayımlanan yeni videoda S.Babayeva E.Abdullayevi əmin edib ki, 1 mln. dollar Prezident Administrasiyasının rəhbəri Ramiz Mehdiyevə çatdırılıb və E.Abdullayevin deputat seçilməsi məsələsi həll olunub.

Bundan sonra G.Əhmədova ölkədən qaçmaq istəyib, lakin Gürcüstan sərhədində saxlanılıb. Üç gündən sonra isə İnterpolun xəttilə S.Babayevanın barəsində axtarış elan edilib. 

Bu məsələnin çoxlu müəmmalı tərəfləri var. Əsasən də niyə S.Babayevadan  ölkədən çıxmamaq haqda iltizam alınmayıb? Əgər ona getməyə imkan yaradılıbsa, niyə G.Əhmədova buraxılmayıb? 

Əgər Azərbaycanın hüquq-mühafizə orqanları həqiqətən İnterpol vasitəsilə S.Babayevanı axtarırdılarsa, o, İstanbulda necə rahat qala bilib, nəzərə alsaq ki, hər iki ölkənin hüquq-mühafizə orqanları arasında sıx əlaqə var. 

Nəhayət, gənc qadının (40 yaş) səhhətində nə kimi problemlər ola bilərdi?

Qeyd edək ki, hələ  ötən həftə müxalifət nəşrləri hakimiyyətə qarşı çox təhlükəli şahid kimi S.Babayevanın “aradan götürüləcəyini” istisna etmirdilər. –06C-