Şimali Koreyanın 8000-ə yaxın əsgəri Ukrayna ilə sərhədə yerləşdirilib

ABŞ-ın qiymətləndirməsinə görə, Şimali Koreyanın 8000-ə yaxın əsgəri Rusiyanın Kursk vilayətində yerləşdirilib və "yaxın günlərdə" Ukraynaya qarşı müharibəyə başlayacağı  gözlənilir, Turan-ın Vaşinqton müxbiri bildirib.

Moskva 10000-ə yaxın  Şimali koreyalıya əsas piyada əməliyyatlarını, pilotsuz təyyarələrin idarə edilməsini, xəndəklərin minalardan təmizlənməsini və artilleriyadan istifadəni öyrədir. Bütün bunlar həmin qüvvələrdən ön cəbhə əməliyyatlarında istifadə olunacağını göstərir, - cümə axşamı dövlət katibi Entoni Blinken və Pentaqon rəhbəri Lloyd Ostin Dövlət Departamentində Cənubi Koreyadan olan  həmkarları ilə görüşdən sonra jurnalistlərə bildiriblər.

Bu, İkinci Dünya Müharibəsindən bəri Avropada ən böyük quru müharibəsinə səbəb ola bilər və Koreya yarımadasında Şimali və Cənubi Koreya arasında artan gərginliyi nəzərə alaraq,  regionlararası qarşıdurmaya çevrilə bilər.

Blinken və Ostin hesab edirlər ki, Vladimir Putinin yeni qoşunlara güvənməsi Kremlin çətinlik çəkdiyinə işarədir. ABŞ-ın hesablamalarına görə, Rusiya hərbçiləri hər gün 1200 nəfər itki verir ki, bu da bütün müharibə boyunca  hər zaman olduğundan daha çoxdur.

"Putin Ukraynada yaratdığı ət maşınına getdikcə daha çox rusiyalı atır. İndi Şimali Koreya qoşunlarına  müraciət edir və bu, zəifliyin açıq əlamətidir", - Blinken deyib.

Ostin bildirib ki, hesablamalara görə,  Rusiyada olan 10000 Şimali Koreya əsgəri Moskvanın itkilərinin yerini doldura bilməyəcək.

Vaşinqton və Seul Pxenyana öz qoşunlarını Rusiyadan çıxarmasının zəruriliyi barədə xəbərdarlıq ediblər və biidiriblər ki, əgər  Şimali Koreya qoşunları Ukraynaya qarşı savaşarsa, "qanuni hərbi hədəf"ə çevriləcək.