Siyasətçilər R.Səfərov barəsində cinayət işini pisləyirlər

"Müdafiə Xətti" hüquq müdafiə təşkilatının icraçı direktoru Rüfət Səfərovun Cinayət Məcəlləsinin 221.1 (xuliqanlıq) və 178.3.2 (dələduzluq-külli miqdarda ziyan vurmaqla törədildikdə) maddələri ilə şübhəli şəxs qismində saxlanılması sosial şəbəkələrdə, müxalif siaysi mühitdə və hüquq müdafiəçiləri tərəfindən tənqidlərlə qarşılanıb.

AXCP sədri Əli Kərimli bildirib ki, Rüfət Səfərov hazırda ölkənin ən cəsarətli və fəal hüquq müdafiəçisidir.

"O, prokurorluqda işindən imtina edib, siyasi məhbus həyatı yaşayıb. Həm hüquqşünasdır, həm də rejimin hədəfində olduğunu bilir.

Rüfət Səfərov yaxın günlərdə hüquq müdafiə sahəsindəki fəaliyyətinə görə mükafat almaq üçun ABŞ-a getməli idi. Belə çıxır ki, hakimiyyət həm Rüfət bəyin ABŞ-a səfərinin qarşısını almaq, həm də hüquq müdafiə fəaliyyətilə bağlı ondan qisas almaq üçün hansısa saxta cinayət işi uydurub.

Hakimiyyəti Rüfət Səfərova qarşı başlanmış şərləmə işindən imtina etməyə, Rüfət bəyi azad etməyə çağırıram", deyə Kərimli facebook səhifəsində yazıb.

Müsavat Partiyasının başqanı İsa Qəmbər  Rüfət Səfərovun saxlanılmasını birmənalı şəkildə qınayır.

"Səfərov Azərbaycanda insan hüquqlarının müdafiəsi sahəsində ən fədakar, ən çox çalışan, mübarizə aparan bir şəxsiyyətdir. Onun həbsi, aydın məsələdir ki, siyasi motivlərlə bağlıdır. Həm onun fəaliyyətini ləngitmək, dayandırmaq, həm də onun nümunəsində cəmiyyəti bir daha hədələmə nümayişi həyata keçirmək məqsədi daşıyır. Yolverilməz bir hadisədir. Hesab edirəm ki, hakimiyyət bu yanlış siyasətini dayandırmalı, Rüfət Səfərovu və bütün siyasi məhbusları həbsdən azad etməlidir", deyə Qəmbər Turan Agentliyinə bildirib.  

Respublikaçı Alternativ (REAL) Partiyasının siyasi komitəsinin sədri Natiq Cəfərli deyib ki, Azərbaycanda insanların siyasi və ictimai fəaliyyətinə görə saxlanılması, həbs olunması yolverilməzdir.

"Azərbaycan, nəhayət, bu təcrübəyə son qoymalıdır. Bu, ölkənin nə beynəlxalq imicinə, nə daxildəki mühitə heç cür müsbət təsir göstərən bir məsələ deyil.

Ümid edirəm ki, yaxın zamanda bu məsələyə aydınlıq gətiriləcək və hüquq müdafiəçisi azadlıqda olacaq", deyə o, Turan Agentliyinə bildirib.

Cəfərli hesab edir ki, ümumiyyətlə Azərbaycan birdəfəlik “siyasi məhbus ayıbı”ndan qurtulmalıdır.

"Yəni XXI əsrdə ölkədə siyasi məhbus anlayışı olmamaldır. Bunun üçün bütün siyasi partiyalar, bütün cəmiyyət tələb etməlidir ki, bu məsələ birdəfəlik Azərbaycanın gündəliyindən çıxsın", deyə o qeyd edib.

"Siyasi Menecment" İnstitutunun rəhbəri Azər Qasımlı hesab edir ki, Azərbaycanda azadlıqda barmaqla sayılacaq sayda hüquq müdafiəçisi qalıb.

"Onlardan biri cəsarəti və işgüzarlığı ilə seçilən Rüfət Səfərovdur. Görünən odur ki, Rüfət bəyi şərləyərək həbs etmək istəyirlər. Səbəb onun hüquq müdafiəçisi kimi fəaliyyət göstərməsidir. İqtidar xalqa, onun fəal və ziyalı kəsiminə qarşı savaş elan edib. Bir tərəfdən insanları sosial problemlərin içində boğur, hüquqlarını tapdayır, o biri tərəfdən də xalqın ləyaqətli övladlarını məhv etməyə çalışır. Dəqiq onu bilirəm ki, bu qarşıdurmada gec-tez xalq qalib gələcək!", deyə Qasımlı facebook səhifəsində yazıb.

Demokratik Qüvvələrin Milli Şurasının sədri Cəmil Həsənli də Səfərovun planlaşdırılmış əməliyyat nəticəsində saxlanıldığı qənaətindədir.

"Milli Şuranın üzvü Tofiq Yaqublu barəsində də bənzər ssenari var idi", deyə o, Turan Agentliyinə bildirib.

"Hakimiyyət siyasi məhbuslara hüquqi, mənəvi və humanitar dəstək göstərən istənilən şəxsi düşmən hesab edir.

Rüfət Səfərov son illər siyasi məhbusların hüquqlarının müdafiəsi üzərində çox israrla və vicdanla işləyirdi. Bu, şübhəsiz ki, hakimiyyətin qəzəbinə səbəb olub", deyə Həsənli qeyd edib.

Səfərov ona şəxsən dövlət katibi Entoni Blinken tərəfindən ABŞ Dövlət Departamentinin hüquq müdafiə fəaliyyətinə görə mükafatının təqdim edilməsinə mane olmaq üçün məhz indi saxlanılıb.

"Bu mükafat Rüfət Səfərovun hüquq müdafiə fəaliyyətinə dəstəyin nümayişidir. Xüsusi mərasim Səfərovun xidmətlərinin beynəlxalq səviyyədə tanınması olardı", deyə Həsənli bildirib.

"Milli Şura Rüfət Səfərovun azad edilməsini tələb edir. Biz onun dekabrın 10-da Vaşinqtonda keçiriləcək tədbirdə iştirak etməsini istəyirik", deyə o bildirib.