Söz azadlığı sahəsində vəziyyət təhlükəli həddə çatıb

Son vaxtlar Azərbaycanda söz azadlığı sahəsində vəziyytə daha da pisləşib, bu barədə Turan-a müsahibəsində Media Hüquqları İnstitutunun (MHİ) rəhbəri Rəşid Hacılı bildirib. O, xüsusən prokurorluğun “Xural” qəzetinin baş redaktoru Əvəz Zeynallının 11 il müddətinə azadlıqdan məhrum edilməsi kimi ağır cinayət cəzası çıxarmaq tələbini qeyd edib. “Azərbaycanın məhkəmə təcrübəsində məhkəmə və prokurorluğun razılaşdırılmış şəkildə hərəkət etdiyini nəzərə alsaq, Zeynallının uzun müddət həbs cəzasına məhkum ediləcəyi şübhə doğurmur. Məhkəmə istintaqı zamanı Zeynallının təqsirinin sübuta yetirilmədiyini nəzərə alsaq, bu, dəhşətli cəza tədbiridir”, deyə Hacılı bildirib. 

Bundan başqa, Qubanın “Xəyal TV” televiziyasının jurnalistləri Vüqar Qonaqov və Zaur Quliyevi də ittiham hökmü gözləyir. Onların rayon icra başçısı Rauf Həbibovun istefası tələbi ilə keçirilən etiraz aksiyasının təşkili ilə heç bir əlaqəsi yoxdur. Jurnalistlər yalnız rayon icra başçısının müşavirədəki çıxışından yerli sakinləri təhqir edən qısa hissəni üçüncü şəxslərə təqdim ediblər.

Söz azadlığına qəsd yazıçı Əkrəm Əylisliyə qarşı hücumlar və onunla fiziki hesablaşma çağırışlarında da özünü göstərib. “Əylislinin romanını tənqidi qiymətləndirmək və hətta onunla razı olmadığını ifadə etmək olar. Lakin istənilən halda hakimiyyət bu narazılıqları alışdırmamalı və qanunsuz axına yönəltməməlidir”, deyə Hacılı bildirib.

Hacılı söz azadlığı sahəsində vəziyyətin pisləşməsinə daha bir nümunə kimi “Azadlıq” qəzetinin Bakı metropoliteninin rəisi Tağı Əhmədovun iddiası ilə 30 min manat cərimə olunmasını göstərib. “Bu, qeyri-adekvat sərt cəzadır. Cinayət-Prosessual Məcəlləyə əsasən, hətta sağlamlığa ağır ziyan vurduqda kompensasiyanın ölçüsü 1000 manatdan çox olmamalıdır”, deyə Hacılı bildirib.

O, həmçinin parlamentdə şəxsi həyat sirrinin müdafiə olunması bəhanəsi ilə deputatların və məmurların razılığı olmadan çəkilişini qadağan edən qanun layihəsi hazırlandığını bildirib. 

Görünür, bundan sonra daha sərt cəza tədbirləri gələcək.

Yaxın günlərdə media ictimaiyyəti nümayəndələri vəziyyəti müzakirə etmək və söz azadlığına qarşı hücumlara qarşı fəaliyyətdə səylərini birləşdirmək niyyətindədirlər. -06B-