Strasburqda İqbal Əbilovu müdafiə aksiyası keçirilib

Bu gün Strasburqda Avropa Sarayının qarşısında talış mədəniyyətinin tədqiqatçısı,  Azərbaycanda həbs olunmuş İqbal Əbilovun müdafiəsi üçün etiraz aksiyası keçirilib.

Aksiya AŞPA-nın payız sessiyasının açılışı ilə əlaqədar  Əbilovun dostları və həmkarları tərəfindən təşkil olunub.

"İqbal Əbilov sosial elmlərlə məşğul olub. Belarusda talış diasporunun fəal üzvü olub.  Azərbaycanda etnik azlıq olan talışların mədəniyyətini araşdırıb", - aksiyanın iştirakçılarından biri Yelena Karol Turan-ın müxbirinə bildirib.

"Azərbaycanda onun elmi fəaliyyətində dövlətin bütövlüyünə təhlükə aşkar edilib və o, dövlətə xəyanətdə ittiham olunub. Ancaq elmi araşdırmaların siyasətlə heç bir əlaqəsi yoxdur və bizim səylərimiz bu işə diqqəti cəlb etmək məqsədi daşıyır", - o deyib.

Onun sözlərinə görə, Əbilov təkcə talışların yox, bütövlükdə Azərbaycan mədəniyyətinin araşdırılmasına öz töhfəsini verib.

"Odur ki, biz Azərbaycan hakimiyyətini İqbalı azad etməyə çağırırıq", - o deyib.

*İqbal Əbilov iyulun 22-də Azərbaycana qohumlarının yanına gələrkən saxlanılıb. Ona qarşı Azərbaycan Cinayət Məcəlləsinin 274 (dövlətə xəyanət), 281.3 (xarici təşkilatların və ya onların nümayəndələrinin tapşırığı ilə dövlətə qarşı yönəlmiş ictimai çağırışlar) və 283.1-ci (milli, irqi, sosial və ya dini nifrət və düşmənçiliyin qızışdırılması) maddələrilə ittiham irəli sürülüb.

Əsasən, bütün bu cinayətlərin Ermənistanın xüsusi xidmət orqanlarının göstərişilə törədildiyi bildirilir.

Əbilov ittihamları rədd edir və yalnız elmi fəaliyyətlə məşğul olduğunu bildirir.

Dünyanın müxtəlif ölkələrindən bir qrup alim Azərbaycan rəhbərliyinə müraciət edərək İqbal Əbilovun azad edilməsinə köməklik göstərilməsini xahiş ediblər.