Taleh Bağırzadə qanunsuz olaraq həbsdə saxlanılır

Qanunsuz narkotik saxlamaqda ittiham olunan Nardaran ilahiyyatçısı Taleh Bağırzadənin işi üzrə ibtidai istintaq başa çatıb.

Cinayət işi baxılması üçün Sabunçu rayon məhkəməsinə verilib, bu barədə Turan-a vəkil Cavad Cavadlı bildirib.

Onun sözlərinə görə, ittiham aktında Bağırzadəyə qarşı yeni ittihamlar irəli sürülməyib.

Bağırzadənin ictimai çıxışlarının dini-linqvistik ekspertizası Dini Qurumlarla İş üzrə Dövlət Komitəsinin əməkdaşları tərəfindən həyata keçirilib və cinayət təhqiqatının predmeti ola biləcək ifadələr aşkar etməyib, deyə o bildirib.

Bu arada, sentyabrın 30-da Bağırzadənin həbs müddəti başa çatıb. Vəkil qeyd edib ki, həbs müddətinin uzadılması haqqında yeni məhkəmə qərarı yoxdur. Buna görə, vəkilin fikrincə, faktiki olaraq, o, qanunsuz həbsdə saxlanılır.

“İstintaq CPM-in işin məhkəməyə verilməsindən sonra həbs müddətinin avtomatik uzadılması haqqında normalara istinad edir. Amma Azərbaycan Konstitusiya Məhkəməsinin qərarı və Avropa İnsan Hüquqları Məhkəməsinin Azərbaycandan olan işlər üzrə presedentləri var ki, onlara əsasən, işin məhkəməyə verilməsi hələ həbs müddətinin avtomatik uzadılması demək deyil.

Həbs müddətinin uzadılması istənilən halda məhkəmənin sanksiyası ilə həyata keçirilməlidir”, deyə vəkil bildirib.

O qeyd edib ki, bu pozuntulardan Avropa İnsan Hüquqları Məhkəməsinə şikayət veriləcək.

Bağırzadə martın 31-də qanunsuz narkotik saxlamaq ittihamı ilə həbs edilib. Bu, onun məscidlərdən birində xütbəsində Azərbaycan hakimiyyətini kəskin tənqid etməsindən bir həftə sonra baş verib. -16B06-