Talış separatçı Azərbaycanın tələbi ilə Moskvada saxlanılıb

Moskva/10.09.18/Turan: Sentyabrın 6-da Moskvanın Lyuberetski rayonunda talış separatçı Fəxrəddin Aboszoda (Abbasov Fəxrəddin Fərman oğlu) həbs edilib. Onun barəsində Azərbaycanın hüquq-mühafizə orqanları tərəfindən AR CM-in 281.2, 283.1-ci maddələrində nəzərdə tutulmuş cinayətləri törətmək (ayrı-seçkilik salma və dövlətçiliyə qarşı çağırış) ittihamı ilə axtarış elan olunmuşdu.

Sentyabrın 7-də Moskvanın Lyuberetski məhkəməsi onu bir ay müddətinə həbs edib.

Aboszodaya qarşı cinayət işi 12 iyul 2018-ci il tarixində Bakı şəhəri Səbail Rayon məhkəməsi tərəfindən açılıb və onun barəsində beynəlxalq axtarış elan olunub.

1994-cü ilə qədər Fəxrəddin Aboszoda BDU-da dərs deyib, 1993-cü ildə "Talış Muğan Respublikası parlamentinin" sədri seçilib.

1994-cü ildə Rusiyaya mühacirət edib. 2005-ci ildə qayıdıb və talış dilində qəzet buraxmağa başlayıb, amma yenidən Rusiyaya gedib.

2010-cu ilin sentyabrında RF hakimiyyəti ona müvəqqəti sığınacaq verib, 2014-cü ildə isə o, xarici vətəndaş üçün oturum izni alıb.

Qeyd edək ki, Aboszoda Azərbaycan əleyhinə çıxışları ilə məşhur idi, Bakını talışların assimilyasiyasında ittiham edirdi. O, həmçinin tez-tez erməni mətbuatında çıxış edir, Azərbaycanı Qarabağın erməni əhalisinin hüquqlarını pozmaqda ittiham edir və separatçı hərəkata bəraət qazandırırdı. -02D-