Tbilisidə baş nazir Əli Əsədov Orta dəhlizin rolundan danışıb

Bakı/26.10.23/Turan:  Azərbaycan və Gürcüstan tarix boyu olduğu kimi, bu gün də Avropa ilə Asiya arasında ticarət-iqtisadi əlaqələrdə körpü rolunu oynamağa davam edirlər. Bu barədə Azərbaycanın baş naziri Əli Əsədov bu gün Tbilisidə keçirilən "İpək Yolu" Beynəlxalq Konfransında çıxışı zamanı bildirib.

Qazaxıstandan Gürcüstan limanlarına Orta dəhliz vasitəsilə yüklərin çatdırılma müddəti əvvəlki illərlə müqayisədə xeyli azalıb. Gələn il üçün məqsəd bu müddəti iki dəfə azaltmaqdır (11-15 günə qədər). Bakı Beynəlxalq Dəniz Ticarət Limanının yük boşaltma qabiliyyətinin ildə 15 milyon tondan 25 milyon tona qədər artırılması istiqamətində fəal iş aparılır.

Azərbaycan-Gürcüstan əməkdaşlığının gündəliyində yeni liman infrastrukturunun yaradılması məsələsi durur və Azərbaycan tərəfi bu istiqamətdə əməkdaşlığa hazırdır.

Əli Əsədov qeyd edib ki, regionda yeni reallıqlar çoxtərəfli əməkdaşlığın keyfiyyətcə yeni səviyyəyə qalxmasına yaxşı şərait yaradır və regionun bütün ölkələrinə iqtisadi və kommersiya dividendləri gətirəcək.

Azərbaycan və Gürcüstanın həyata keçirdiyi birgə layihələr Avropanın enerji təhlükəsizliyinə mühüm  töhfə verir, perspektivdə Cənub qaz dəhlizlə Avropaya nəql olunan Azərbaycan qazının həcmi iki dəfə artırılacaq, eyni zamanda, Avropaya "yaşıl" enerji körpüsünün tikintisinə başlanılıb. 0