Təcridxanada Akif Qurbanovu və digər məhbusları təhdid edirlər

Respublika III Platforması bəyanatla çıxış edərək 1 saylı Bakı İstintaq Təcridxanasında bu təşkilatın lideri Akif Qurbanova qarşı təhdidlərdən bəhs edib.

Əsasən  deyilir ki, yüksək vəzifəli dövlət məmuru təcridxanaya gələrək Qurbanovdan dövlət başçısının ünvanına  ittiham dolu çıxışını dayandırmağı tələb edib. Əks təqdirdə, Qurbanovu işgəncə ilə təhdid ediblər.

“Eyni zamanda, “Toplum TV” işi üzrə  və Demokratik Təşəbbüslər İnstitutunun qanunsuz həbs edilən digər şəxsləri 1 saylı Bakı İstintaq Təcridxanasının rəisi Elnur İsmayılovun təhdidlərinə məruz qalıblar. O həmçinin bildirib ki, Akif Qurbanov oxşar bəyanatlarla çıxış etməyə davam edərsə, onların vəziyyəti pisləşəcək. Onları pis  rəftarla hədələyiblər", - bəyanatda deyilir.

"İstintaq təcridxanasında və islah müəssisələrindəki siyasi məhbuslar da işgəncə təhdidlərilə üzləşirlər", - bəyanatda qeyd olunub.

Bütün bunlar ölkənin imzaladığı beynəlxalq hüquqi sənədlər, o cümlədən Birləşmiş Millətlər Təşkilatının Mülki və Siyasi Hüquqlar Haqqında Beynəlxalq Paktının 7-ci maddəsi, Avropa İnsan Hüquqları Konvensiyasının 3-cü maddəsi, işgəncələrə və digər amansız, qeyri-insani və ya ləyaqəti alçaldan rəftar və cəza növlərinə qarşı Konvensiya çərçivəsində Azərbaycanın öhdəliklərini pozur, platformanın bəyanatında qeyd olunur.

Sənəd müəllifləri həyəcan təbili çalır və Azərbaycan hakimiyyətini siyasi məhbuslarla qeyri-insani rəftara son qoymağa və onları dərhal azad etməyə çağırırlar.

Onlar həmçinin beynəlxalq təşkilatları və Bakıdakı xarici səfirlikləri Akif Qurbanov və onun işi üzrə həbs edilmiş digər şəxslərlə qeyri-insani rəftara son qoyulması üçün öz mandatları çərçivəsində tədbirlər görməyə çağırırlar.

Penitensiar Xidmətdən bununla bağlı aşağıdakıları bildiriblər: "Qeyd edilənlər həqiqəti əks etdirmir, həbs edilmiş şəxs Akif Qurbanovun hər hansı kənar şəxs tərəfindən qəbul edilərək hədələnməsi, eyni zamanda təcridxana rəhbərliyi tərəfindən təhdid edilməsi iddiaları tam əsassızdır, o cümlədən onun telefon danışıqlarına və görüşlərinə məhdudiyyət qoyulmamış, qanunvericilikdə nəzərdə tutulmuş qaydada və sayda ona ailə üzvləri ilə görüşmək, telefonla zəng etmək, sovqat qəbul etmək üçün şərait yaradılır". 

*Bir həftə əvvəl Qurbanovun Apellyasiya Məhkəməsindəki çıxışı KİV-də yayılıb, o, ölkə hakimiyyətini və təhlükəsizlik qüvvələrinin hökumətin tənqidçilərinə qarşı repressiyaların həyata keçirilməsindəki metodlarını sərt tənqid edib.

Tərəfdarlarının  sözlərinə görə, bundan sonra Qurbanovu qohumları ilə görüşlərdən və telefon danışıqlarından məhrum ediblər. Lakin Penitensiar Xidmət bu iddiaları təkzib edərək bildirib ki, onun bağlama alması, görüş və telefon danışıqları ilə bağlı heç bir məhdudiyyət yoxdur.

** Akif Qurbanov 6 mart 2024-cü ildə “Toplum” TV-nin işi çərçivəsində saxlanılıb. Martın 8-də Xətai Rayon Məhkəməsi onu 4 ay müddətinə həbs edib.

Həmçinin “Toplum TV” saytının təsisçisi Ələsgər Məmmədli, III Respublika Platformasının üzvü Ruslan İzzətli, "Toplum" TV-nin redaktoru Müşfiq Cabbar, Demokratik Təşəbbüslər İnstitutunun əməkdaşları Ramil Babayev, İlkin əmrahov və Əli Zeynal saxlanılıblar.

Saxlanılanların hamısı valyuta qaçaqmalçılığında ittiham olunub, hakimiyyətyönlü KİV isə həmin şəxslərin guya xaricdən guya "qanunsuz" qrant aldığını bildirib.

Beynəlxalq təşkilatlar, o cümlədən ABŞ Dövlət Departamenti Azərbaycan hakimiyyətini haqsız yerə həbs olunanları azad etməyə çağırıb.