Təcridxananın rəisi ictimai fəal, I qrup əlil Famil Xəlilova təşəkkürnamə imzalyıb

54 gündür aclıq edən ictimai fəal, I qrup əlil Famil Xəlilovun saxlandığı 1 saylı Bakı İstintaq Təcridxanasının rəisi Elnur İsmayılov oktyabrın 4-də onun haqqında yazılı surətdə tərifnamə-təşəkkürnamə imzalayıb. Təcridxananın rəisi Xəlilovun saxlandığı kameraya gələrək, yazılı tərifnaməni rəsmən təqdim edib, onu nümunəvi məhkum kimi digər məhkumlara təqdim edib.

Bu barədə Famil Xəlilovun həyat yoldaşı Kiçikxanım Xəlilova oktyabrın 6-da onunla telefon danışığından sonra bildirib.

Onun sözlərinə görə, Famil Xəlilov aclığı davam etdirir, lakin bir neçə gün quru aclıq etdikdən sonra səhhəti kəskin pisləşib və su içməyə başlayıb.

Hüquq müdafiəçisi Rüfət Səfərov hesab edir ki, təcridxananın rəisinin yanaşması Famil Xəlilovun aclığı dayandırması üçün bir vasitədir. Əvvəlcə Xəlilova onu təhdid edən başqa məhkumlar vasitəsilə təzyiq göstərməyə çalışıblar, bu, nəticə vermədikdə isə tərifləməyə başlayıblar.

Penitensiar Xidmətdən Xəlilova tərifnamə verilməsi faktı ilə bağlı şərh almaq mümkün olmayıb.

* Qolları iflic olan əlil Famil Xəlilov bu il mayın 2-də saxlanılıb, ona qarşı Cinayət Məcəlləsinin 234.4.3-cü (satış məqsədilə küllü miqdarda narkotik hazırlama, daşıma, saxlama) maddəsi ilə ittiham irəli sürülüb. Fəal barəsində həbs qətimkan tədbiri seçilib. Bu maddədə 5 ildən 12 ilədək həbs cəzası nəzərdə tutulub.

Yaxınları onun təqsirsiz olduğunu, sosial şəbəkələrdəki paylaşımlarına görə cəzalandırıldığını deyirlər.

Avqustun 15-dən Xəlilov azad edilməsi tələbi ilə aclıq aksiyasına başlayıb.