Tehran sammitində Azərbaycanı xüsusi tapşırıqlar üzrə səfir təmsil edəcək

Avqustun 28-29-də Qoşulmama Hərəkatının Tehran zirvə toplantısı çərçivəsində keçirilməsi nəzərdə tutulan xarici işlər nazirlərinin iclasında Azərbaycan nümayəndə heyətinə XİN-in xüsusi tapşırıqlar üzrə səfiri Yaşar Əliyev rəhbərlik edəcək. Bu barədə Azərbaycan XİN-in  məlumatında deyilir. 

Azərbaycan Qoşulmama Hərəkatına 2011-ci ildə qoşulub. İran tərəfi zirvə görüşündə iştirak üçün prezident İlham Əliyevə dəvət məktubu göndərib. Ötən həftə isə İranın xarici işlər nazirinin müavini Bakıda Azərbaycan xarici işlər naziri  ilə bununla bağlı danışıqlar aparıb.

Son dövrdə İran-Azərbaycan münasibətləri gərgin olaraq alır. Belə ki, İran bu ilin mayında Bakıda keçirilən “Eurovision” mahnı müsabiqəsi ilə bağlı Azərbaycana qarşı müxtəlif aspektli qarayaxmalar səsləndirib. Azərbaycan təhlükəsizlik orqanları isə ölkənin müxtəlif regionlarında şəbəkələşmiş və “Eurovision” müsabiqəsi dövründə terror aktları planlaşdıran İranın xüsusi xidmət orqanlarına bağlı mütəşəkkil cinayətkar dəstəni zərərsizləşdirib. “The Teleqraph” qəzetinin yazdığına görə, İranın ali dini lideri Seyyid Əli  Xamneyi İran İnqilab Keşikçiləri Korpusuna Bakıda “Eurovision” zamanı terror aktları törətməklə bağlı şəxsən göstəriş verib. -03B- 

Qoşulmama Hərəkatının sammitində Azərbaycanı kim təmsil edir?

Tehranda 120 ölkənin dövlət və hökumət başçılarının iştirakı ilə Qoşulmama Hərəkatının 16-cı sammiti keçirilir. Sammit bazar günü ekspertlər birliyinin məsləhətləşmələri ilə açılıb. İran KİV-lərinin məlumatlarından aydın olur ki, rəsmi Tehran Amerika hegemonluğuna qarşı antiqlobalist qüvvələrin nümayişlərindən istifadə etmək niyyətindədir. İran həmçinin Suriya böhranını tənzimləmə və Əsəd rejimini xilas etmə planını təqdim etmək istəyir. 

ABŞ və İsrail BMT baş katibi Pan Gi Munun Tehrana səfərinə etiraz ediblər. Onlar qərb əleyhinə yönəlmiş bu sammiti pozmaq üçün bir sıra addımlar atıblar.

Türkiyə prezidenti Abdullah Gül sağlamlığı ilə əlaqədar tədbirə qatılmayıb. Rusiya prezidenti Vladimir Putin də iş qrafikinin sıx olduğu üçün Tehrana getməyib. Fars körfəzi ölkələrindən ABŞ-ın müttəfiqləri isə nümayişkaranə şəkildə görüşə məhəl qoymayıblar.

İlham Əliyev də açıqlanmayan səbəblər üzündən sammitə getməyib. Cümə günü İranın xarici işlər nazirinin müavini Seyid Abbas Araqçı onu sammitə gəlməyə razı salmaq üçün Bakıya gəlib, lakin Əliyev “ailə məsələləri ilə əlaqədar” Bakıda olmayıb.

Azərbaycan XİN hələlik sammitdə ölkəni təmsil edəcək şəxsin adını çəkə bilmir, bu məsələni daha sonra açıqlamağı vəd edir. 

Beləliklə, Tehranın sammitdən Azərbaycan-İran əlaqələrində “anlaşılmazlığı” aradan qaldırmaq üçün istifadə etmək cəhdləri baş tutmayıb.

Qoşulmama Hərəkatına cəmi bir il əvvəl daxil olmuş Azərbaycan İran rejiminin tənqidçiləri sırasında durdu.

Üçüncü dünya ölkələrində ciddi siyasi dəyişikliklər şəraitində Tehranın yeni demokratik ölkələrin – Misir, İraq və Liviyanın dəstəyini alması çətin olacaq.

İran yalnız Kuba, Venesuela, Belarus kimi ölkələrin həmrəyliyinə ümid edə bilər. -0-