Tofiq Yaqublu xəstəxanada sistem qəbulundan da imtina edib

Bakı/14.09.20/Turan:   Azərbaycan Respublikasının İnsan Hüquqları üzrə Müvəkkili Səbinə Əliyevanın tapşırığı əsasında 14.09.2020-ci il tarixdə Ombudsmanın Milli Preventiv Qrupunun (MPQ) həkim üzvü tərəfindən qida qəbulundan imtina etməsi ilə bağlı Ədliyyə Nazirliyi Penitensiar Xidmətinin 3 saylı İstintaq Təcridxanasından “City Hospital”a köçürülmüş Tofiq Yaqubluya baş çəkilib, onun səhhəti ilə maraqlanılıb, tibbi sənədləri araşdırılıb. Bu barədə Ombudsman Aparatının press-relizində bildirilir.

Görüş zamanı T.Yaqublunun sağlamlıq vəziyyəti, həmçinin onun həkimi professor Adil Qeybulla ilə də müzakirə olunub. T.Yaqublunun hazırda da qida qəbul etmədiyi, səhhətinin stabil və həkim nəzarətində olduğu müşahidə edilib. Məsələ Ombudsman tərəfindən diqqətdə saxlanılır.

Bu arada Tofiq Yaqublu xəstəxanada sistem qəbulundan da imtina edib. Bu barədə qızı Nigar Həzi məlumat verib.

Nigar Həzi sentyabrın 14-də günorta saat 15:00 radələrində xəstəxanada atası ilə görüşüb.

Onun sözlərinə görə, Tofiq Yaqublunun hələ də reanimasiyadadır və orada mühafizə altında saxlanılır:

“Nəzarət altında görüşüb, 15 dəqiqə danışmaq imkanımız oldu. Bildirdi ki, bu gündən sistemlərin də qəbulunu dayandırmışam. Hətta Adil bəy israr etsə belə, qəbul etməyəcəyini dedi. Heç bir qidalanmadan söhbət gedə bilməz. Vəkillərin də hər gün onunla görüşməsinə şərait yaradılmasını tələb etdi. Vəkillərinin üçünün də...".

Nigar Həzi atasının daha da zəiflədiyini bildirib.

Nigar Həzinin sözlərinə görə, Tofuq Yaqublu onunla görüşdə bu məsələyə də münasibət bildirib:

"Dedi ki, aclıq barədə rəsmi ərizəni ondan sentyabrın 7-də alıblar. Amma o ərizədə də göstərib ki, sentyabrın 2-dən aclıq edir. Bu məsələdə də saxtakarlıq edirlər. Belə deyilsə, Tofiq Yaqublunun həmin ərizəsini ortaya qoysunlar. Orada "sentyabrın 2-dən" kəlməsi qeyd olunub. Bütün dünya bilir, bunlar bilmir?".

T.Yaqublunun özəl klinikaya köçürülməsini müdafiə tərəfi Avropa İnsan Hüquqlar Məhkəməsinə müraciət etmələri ilə izah edib.—06в-