Tofiq Yaqublunun həbs müddəti uzadılıb

Bu gün Nəsimi Rayon Məhkəməsi Müsavat Partiyası başqanının müavini və “Müsavat” qəzetinin şərhçisi Tofiq Yaqublunun barəsində həbs qətimkan tədbirini daha  3 ay uzadıb. Bu barədə Turan-a T.Yaqublunun vəkili Nemət Kərimli bildirib.

İstintaq həbsin uzadılmasını “cinayət işinin mürəkkəbliyi” ilə əsaslandırıb. T.Yaqublu etirazını bildirərək yenidən deyib ki, o, siyasi motivlərlə həbs olunub. Eyni zamanda qeyd edib ki, onu qorxutmaq mümkün deyil və sonadək mübarizə aparacaq.

Xatırladaq ki, T. Yaqublu və REAL hərəkatının sədri İlqar Məmmədova qarşı Cinayət Məcəlləsinin 220.1-ci (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) və 315.2-ci (hakimiyyət nümayəndəsinə zor tətbiq etmə və ya müqavimət göstərmə) maddəsi ilə ittiham irəli sürülüb. Onlar yanvarın 23 və 24-də İsmayıllıda baş vermiş aksiyalar zamanı ictimai qaydanı pozmaqda və vətəndaşları iğtişaşlara təhrik etməkdə təqsirli bilinirlər. -16D-