Tomas Melia insan hüquqlarına hörmət etməyə çağırdı

ABŞ dövlət katibinin demokratiya, insan hüquqları və əmək məsələləri üzrə köməkçisinin müavini Tomas Melianın rəhbərlik etdiyi ABŞ nümayəndə heyəti Azərbaycan hakimiyyətini vətəndaş cəmiyyəti və müxalifətlə dialoqa çağırıb.

Bu barədə Melia aprelin 18-də rəsmi şəxslər, vətəndaş cəmiyyəti fəalları və müxalifət nümayəndələri ilə görüşlərinin yekunlarına həsr olunmuş mətbuat konfransında bildirib.

Melia bildirib ki, görüşlər zamanı o, ifadə və toplaşmaq azadlıqlarına görə həbs edilənlərlə əlaqədar narahatlığını bildirib və bu şəxsləri azad etməyə çağırıb.

O, əvvəlki səfəri zamanı görüşdüyü REAL hərəkatının lideri İlqar Məmmədovla bu dəfə görüşə bilməməsi ilə bağlı xüsusi təəssüfünü bildirib.

Melia qeyd edib ki, istintaq təcridxanasında Məmmədovla görüşmək istəyib, lakin bu xahişinə cavab almayıb.

Melianın sözlərinə görə, o, Azərbaycan hakimiyyətini vətəndaş cəmiyyəti fəallarına təzyiqlərə son qoymağa və QHT-lərin fəaliyyəti üçün maneələri aradan qaldırmağa çağırıb. O, demokratiya ideyalarına sadiq olan qurumların və xüsusən Azad Fikir Universitetinin fəaliyyəti üçün şərait yaradılmasının əhəmiyyətini qeyd edib.

Qarşıda duran prezident seçkilərinə toxunan Melia qeyd edib ki, bu, Azərbaycan üçün beynəlxalq öhdəliklərə riayət etdiyini nümayiş etdirmək üçün yaxşı imkan olacaq.

Milli Demokratiya İnstitutunun Azərbaycanda gələcək fəaliyyəti ilə bağlı məsələyə toxunan Melia bu həftə qurum nümayəndələrinin Azərbaycan rəsmiləri ilə görüşlər keçirdiyini bildirərək, məsələnin aydınlaşdırılacağına ümid etdiyini vurğulayıb.

Azərbaycan rəhbərliyi ilə danışıqların təfsilatına varmayan Melia onları açıq və ciddi müzakirələr adlandırıb.

Melia həmçinin bildirib ki, sabah Dövlət Departamentinin Azərbaycanda insan hüquqları sahəsində vəziyyət haqqında illik hesabatı dərc ediləcək. -16/03/06-