Türkiyə daxili işlər nazirinin oğlu rüşvətə görə həbs olunub

Türkiyədə daxili işlər və iqtisadiyyat nazirlərinin oğullarına qarşı səs-küyə səbəb olan korrupsiya qalmaqalında iştirak ittihamı irəli sürülüb. İstanbul məhkəməsinin qərarı ilə nazir övladları həbsə alınıb, xəbəri Türkiyə KİV yayıb.

İstanbul prokurorluğunun məlumatına görə, ekologiya nazirinin oğlu, “Halkbank”ın rəhbəri və məşhur sahibkar Reza Zərrab da həbs edilib. Eyni zamanda, saxlanılanların bir neçəsi ölkəni tərk etməmək iltizamı alınmaqla sərbəst buraxılıb.

Dekabrın 17-də Türkiyədə maliyyə cinayətlərinə qarşı mübarizə idarəsi “Böyük rüşvət” adlı antikorrupsiya əməliyyatı həyata keçirib, hökumətin bəyanatlarına görə, bu əməliyyat ölkə rəhbərliyi üçün gözlənilməzo lub. Erdoğan əməliyyatı “çirkli” və “hökumətin gözdən salınmasına və parçalanmasına yönəlmiş” əməliyyat adlandırıb. Hakimiyyət əməliyyatı təxribat hesab etsə də, rəsmi Ankara bildirib ki, istintaqa və məhkəməyə heç bir şəkildə təsir göstərməyəcək və işin istənilən nəticəsini hörmətlə qarşılayacaq.

Bu korrupsiya işi üzrə hakimiyyətin yüksək eşelonlarında təqsirləndirilən şəxs qismində 50-dən çox insan keçir. Cümə günü bu iş çərçivəsində səkkiz nəfər həbs edilib. Çərşənbə axşamı həmçinin ətraf mühit və şəhərsalma işləri üzrə nazirin oğlu da saxlanılıb, lakin o, cümədən şənbəyə keçən gecə uzun müddət dindirmədən sonra sərbəst buraxılıb.

Bu, belə böyük miqyaslı qalmaqalın bilavasitə 2002-ci ildən Türkiyə hökumətinə başçılıq edən baş nazir Tayyip Erdoğanın çevrəsinə toxunduğu ilk hadisədir.

DHA informasiya agentliyinin məlumatına görə, Erdoğan hökumətin əsaslı şəkildə yenidən təşkil etmək niyyətindədir. Nazirlərin ən az yarısı, o cümlədən korrupsiya qalmaqalı ilə əlaqədar üzərinə şübhə düşənlər vəzifələrindən məhrum ola bilər.

Müxalifət hakim partiyanın vətəndaşların etimadını itirdiyi üçün artıq hökumət formalaşdıra bilməyəcəyində israr edir və Erdoğanı istefa verməyə çağırır. -02D-