Türkiyə Həcc ziyarətinin təşkilini öz üzərinə götürmək istəyir

Türkiyə hakim Ədalət və Dirçəliş Partiyasının (AKP) sədr müavini Mehmet Əli Şahin Həcc ziyarəti təşkilinin Türkiyə dövlətinə verilməsi təklifini səsləndirib. Bu xəbəri Türkiyənin xəbər saytları yayıblar.

Bu təklifin səsləndirilməsinə səbəb bu il Həcc ziyarəti başlayandan bu yana Məkkədə çoxsaylı insan itkisilə müşayiət olunan hadisələrin baş verməsidir. 

M.Şahin Həcc ziyarəti təşkilinin təhlükəsizlik sahəsində ciddi nöqsanların olduğunu bəyan edib və buna görə Həccin təşkilinin Türkiyəyə verilməsi bəyanatını səsləndirib.

“Baş verən hadisələrə və faciənin nəticələrinə “tale”, “vaxtı çatdı”, “əcəl” və s. deyib keçmək mümkün deyil, Məkkə və çevrəsi Səudiyyə Ərəbistanına aid olsa da  bu müqəddəs məkanın bütün müsəlmanlara da aiddir”, - M.Şahin təklifini əsaslandırıb.   Onun fikrincə, təhlükəsizlik probleminin həllilə bağlı bütün müsəlman ölkələrinin birgə müzakirələr aparmasında fayda var.

“Oradan gələnlər buradan gələnləri sıxışdırıb əziblər, elə şey olar? Bunu dünyaya necə izah edəcəksiniz? Minə yaxın, 753 insan dünyasını dəyişib, belə şey olar? Heç kimsə millətçilik etdiyimi düşünməsin. Versinlər təşkili Türkiyəyə, Allahın izni ilə heç kimin burnunu qanatmadan Həcc ziyarətini təşkil edər. Zəhmət haqqı da istəmirik, Səudiyyəyə müraciət edirəm, verin bizə, Türkiyə olaraq ziyarətin təşkilatçılığını intizamlı şəkildə həll edərik”, - deyə M.Şahin israrında davam edib.

M.Şahin Səudiyyə rəsmilərinin faciəni zəvvarların səhlənkarlığıl ilə əlaqələndirmək istəməsinə kəskin etiraz bildirib. “Qardaşım, tədbiri sən görəcək, intizamı sən təmin edəcək, istiqamət verəcəksən. Afrikadan gəlib, ola bilər ki, gediş-gəlişi bilmirlər. Öyrədən, yol göstərən siz olmalısınız. Bunun bəhanəsi ola bilməz, səhlənkarlıq nəticəsində insan tələfatı meydana gəlib, bir daha belə şeylərin olmamasını təmənna edirik”, - M.Şahin rəsmi ər-Riyadı ittiham edib. 

Bu il Həcc ziyarəti başlayandan bu yana Məkkədə ard-arda faciəvi sonluqla bitən hadisələr baş verib. Tikinti kranının aşması nəticəsində 108 nəfər həlak olub, 200-ə yaxın insan yaralanıb. Bir yanğın nəticəsində 4 nəfər həlak olub, dağ uçqunu daha 4 nəfərin canını alıb, ardınca daha bir yanğında 3 nəfər həyatını itirib.

Mina dağında baş verən hadisədə 753 nəfər həlak olub, 900-dən çox insan isə bədən xəsarətləri alıb.  

Bütün bu hadisələrdən sonra çıxış edən M.Şahin baş verənləri Səudiyyə tərəfin dediyi “Allahın iradəsi” yox, rəsmi ər-Riyadın təhlükəsizliyi təmin edə bilməməsinin nəticəsi kimi dəyərləndirib.-05D-