Turqut Qəmbəri həbslə hədələyiblər (YENİLƏNİB)

NİDA hərəkatının idarə heyətinin üzvü Turqut Qəmbər Bakı Apellyasiya Məhkəməsinin binası qarşısında saxlanıldıqdan sonra bir neçə saat Bakı şəhər Baş Polis İdarəsində saxlanılıb.

"Mənə saxlanılmağımın səbəbini söyləməyiblər, amma uzun müddət Elgiz Qəhrəman (avqustun 12-də qanunsuz narkotik dövriyyəsi ittihamı ilə həbs olunmuş NİDA fəalı), onu niyə dəstəklədiyimiz barədə sorğu-sual ediblər. Niyə "dövlətin əleyhinə çıxdığımızı" soruşurdular, deyə Qəmbər Turan agentliyinə bildirib.

"Əslində məni həbslə hədələdilər", deyən Qəmbər qanunazidd əməl törətmədiyini əlavə edib.

"Biz sadəcə fəalların işləri üzrə bütün proseslərdə olduğu kimi, Apellyasiya Məhkəməsinin binası qarşısında dayanıb dostumuzun içi üzrə məhkəmənin qərarını gözləyirdik", deyə Qəmbər qeyd edib. -06D-

2016 Avqust 18 (Cümə axşamı) 16:17:50

Günortaya yaxın Bakı Apellyasiya Məhkəməsinin binası yaxınlığında saxlanılan NİDA hərəkatının üzvü Turqut Qəmbəri paytaxt polisi saat 16:00 radələrində azad edib.

Bu zaman Qəmbəri yoldaşlarının və jurnalistlərin qapısı ağzında gözlədikləri binadan buraxmayıblar, maşınla aparıb metronun "Nərimanov" stansiyası yaxınlığında endiriblər.

Bu barədə Turan-a NİDA hərəkatının idarə heyətinin üzvü Ülvi Həsənli bildirib.

Hələlik polis əməkdaşlarının iradlarının nədən ibarət olduğu məlum deyil. Bu gün Apellyasiya Məhkəməsinin binası qarşısında saxlanılan digər gənc fəal İsmi Şahzadə də polis əməkdaşları fotoaparatının və mobil telefonun yaddaşına baxdıqdan sonra sərbəst buraxılıb. -06D-

2016 Avqust 18 (Cümə axşamı) 12:31:53

NİDA Vətəndaş Hərəkatının fəalı Turqut Qəmbər bu gün saat 12:00-a yaxın Apellyasiya  Məhkəməsinin  qarşısında özlərini Bakı Baş Polis İdarəsinin əməkdaşları kimi təqdim edən mülki geyimli şəxslər tərəfindən saxlanılıb. Həmin şəxslər bildiriblər ki, Turqut onlarla getməlidir, “çünki ona bəzi sualları var”. Bu barədə Turan-a  NİDA Vətəndaş Hərəkatının  İdarə Heyətinin  üzvü Ülvi Həsənli bildirib.

Onun sözlərinə görə, T.Qəmbər avqustun 12-də qanunsuz narkotik maddə dövriyyəsi ittihamı ilə həbs olunan NİDA fəalı Elgiz Qəhrəmanovun işi üzrə proseslə əlaqədar Apellyasiya  Məhkəməsinin  qarşısına gedib.

Sonradan həmin şəxslər fotoqraf İsmi Şahzadəni saxlayıblar. Reportaj hazırlayan jurnalist İslam Şıxəlinin isə   mobil telefonunu alıblar.  Polis  məhkəmənin önünə   yığışan  fəalları  sıxışdıraraq uzaqlaşdırıb.

Turan-ın paytaxt polisindən şərh almaq çəhdləri baş tutmayıb. Qeyd edək ki, Turqut Qəmbər Müsavat Partiyasının keçmiş sədri İsa Qəmbərin oğludur.16/03B-