Ukrayna Amerika HHM vasitələrinin alıcıları siyahısında ilk yerdədir

Cümə axşamı Bayden administrasiyası bildirib ki, HHM raket sistemlərinin alıcıları növbəsində Ukraynanı birinci yerə qoyur, xəbəri Turan-ın Vaşinqtondakı müxbiri verib.

ABŞ digər ölkələr qrupu üçün Patriot və NASAM raketlərinin tədarük "prioritetlərini dəyişdirəcək" ki, onlar ilk növbədə Ukraynaya daxil olsun, deyə Ağ Ev cümə axşamı bildirib.

Ukraynaya tədarük bu yay başlayacaq. Bu addım Kiyevin enerji infrastrukturunun müdafiəsi üçün ona ən az yeddi ədəd "Patriot" raket kompleksi tədarük etməyə çağırması ilə əlaqədar qəbul edilib.

Ukrayna prezidenti Vladimir Zelenski artıq bu addım üçün prezident Co Baydenə təşəkkür edib. "Kritik əhəmiyyət kəsb edən HHM vasitələrinin tədarükündə Ukraynaya prioritet diqqət yetirdiyinə görə prezident Baydenə və Birləşmiş Ştatlara dərin təşəkkürümü bildirirəm", deyə Zelenski X platformasında yazıb.

Brifinqdə Turan-ın müxbirinin bu qərara nəyin səbəb olduğu haqqında sualına cavabda Dövlət Departamentinin rəsmi nümayəndəsi Metyu Miller belə deyib: "Biz Rusiya hərbiçilərinin Ukrayna şəhərlərinə, enerji infrastrukturuna zərbələr endirərək qışda bütün ölkəni istilikdən məhrum etmək istədiklərini açıq-aşkar göstərdiyini gördük".