Ulraynanın Müstəqillik Günündə ABŞ bu ölkəyə hərbi yardım paketi ayırıb və Rusiyaya qarşı yeni sanksiyalar tətbiq edib

Cümə günü Bayden Administrasiyası Rusiyaya qarşı yeni sanksiyalar tətbiq edildiyini və 33-cü Müstəqillik Gününü qeyd edən Ukrayna üçün yeni hərbi yardım paketi ayrıldığını açıqlayıb, xəbəri Turan-ın Vaşinqtondakı müxbiri verib.

Prezident Bayden Vladimir Zelenski ilə söhbətində hava hücumundan müdafiə raketlərinin, PUA əleyhinə avadanlığın, raket və döyüş sursatlarının daxil olduğu yeni hərbi yardım paketi ayrıldığını açıqlayıb. 

"Rusiya bu münaqişədə qalib gəlməyəcək. Müstəqil Ukrayna xalqı qalib gələcək və Birləşmiş Ştatlar, bizim müttəfiqlərimiz və tərəfdaşlarımız hər addımlarında onları dəstəkləməyə davam edəcək", deyə Bayden qeyd edib.

Cümə günü günorta saatlarında ukraynalı həmkarı Rustem Umerovla söhbət edən müdafiə naziri Lloyd Ostin bildirib ki, sonuncu tranş 125 milyon dollar dəyərindədir. Yeni paket Ukrayna hərbiçilərinin Xarkov bölgəsində torpaqları azad etdiklərini və Kursk bölgəsinə zərbə endirmək üçün Amerika bombalarından istifadə etdiklərini bildirdiyi bir vaxta təsadüf edib.

Blinken ayrıca bəyanatında sanksiyalara məruz qalan 400 təşkilat haqqında ətraflı məlumat verib.

"Yeni sanksiyalar əvvəlki sanksiyalardan yayınmağa kömək edənlərə, o cümlədən Çindəki şirkətlərə və Rusiyanın enerji resurslarının gələcək istehsalını və ixracını dəstəkləyənlərə qarşı yönəlib", deyə o, qeyd edib.

"Biz həmçinin həm Rusiyada, həm də Belarusda Rusiya üçün silahlı PUA-ların, raketlərin, qırıcı təyyarələrin, zirehli texnikanın, müdafiə elektronikasının və döyüş sursatlarının istehsalında iştirak edən təşkilatlara və fərdi şəxslərə qarşı sanksiyalar tətbiq edirik.

"Biz Rusiyanın təcavüzkar müharibə aparmaq üçün beynəlxalq maliyyə sistemindən istifadə etməsinə mane olmaq və Putinin hücumunun strateji uğursuzluqla nəticələnməsinə zəmanət vermək üçün bütün mümkün alətlərdən istifadə edəcəyik", deyə Blinken bildirib.