USAID-ə qarşı hücumun arxasında nə dayanır?

Bakı/22.11.23/Turan: USAID Azərbaycanda fəaliyyətini davam etdirə bilməyəcək - hökumətyönlü KİV-lərin və bir sıra ölkə rəsmilərinin qaldırdığı təbliğat səs-küyündən belə nəticə çıxarmaq olar.

 USAİD-ə qarşı hücum guya Amerikanın bu təşkilatının maliyyələşdirdiyi Abzas Media onlayn nəşrinin rəhbərlərinin saxlanılmasından dərhal sonra başlayıb.

Lakin "əsl" narazılıq partlayışı USAİD-in Qarabağdan erməni qaçqınlara 4 mln. dollar ayırması haqqında məlumatdan sonra baş verib.

USAİD rəhbəri Samanta Pauerin bu insanların Azərbaycanın hərbi əməliyyatı nəticəsində Qarabağı tərk etməsi haqqında tviti rəsmi Bakı tərəfindən, demək olar ki, ölkənin suverenliyinin pozulması kimi qarşılanıb. 

Adətən sakit olan dövlət başçısının xarici siyasət məsələləri üzrə köməkçisi Hikmət Hacıyev Samanta Pauerin ünvanına qəzəb dolu uzun tirada yazıb. O, Paueri Qarabağın keçmiş "dövlət naziri" Ruben Vardanyanla dostluqda və "Avrora" proqramında iştirak etməkdə imtina edib.

"Azərbacanofobiya, türkofoboya, siyasi korrupsiya və siyasi spekulyasiyalar, çox güman ki, Ruben Vardanyan və Samanta Pauerin ortaq dəyərləri və maraqları olub", Azərbaycan prezidentinin köməkçisi belə hesab edir.

Hacıyev Pauerin "Cəhənnəmdən bir problem: Amerika və soyqırım çağı" kitabında "Ermənistanın azərbaycanlılara qarşı soyqırımı və vəhşiliklərindən" bəhs etmədiyini yada salıb.

Azərbaycan torpaqlarının Ermənistanın işğalı altında olduğu 30 il ərzində, bir milyondan çox azərbaycanlının etnik təmizləməyə məruz qaldığı zaman ABŞ işğalçı Ermənistan dövlətinin yanında dayanıb. "Bu gün eyni siyasət eyni forma və təzahürdə davam edir", deyə Hacıyev yazır və Paueri BMT Təhlükəsizlik Şurasında ABŞ-ın nümayəndəsi olarkən heç vaxt azərbaycanlı qaçqınların və məcburi köçkünlərin ağır vəziyyəti məsələsini qaldırmamaqda və BMT TŞ-nin qətnamələrinin yerinə yetirilməsini tələb etməməkdə ittiham edir.

"Maskalar çıxıb! Artıq USAİD-in Azərbaycanda fəaliyyətinə yer yoxdur!", deyə Hikmət Hacıyev (yeri gəlmişkən, Amerika Corc Marşall Mərkəzinin, NATO Müdafiə kollecinin və Belçikanın ULB Universitetinin məzunu) öz hökmünü verir.

Göründüyü qədər, rəsmi Bakı noyabrın 15-dəki dinləmələri və orada Azərbaycan hakimiyyətinin ünvanına səslənən ittihamları Vaşinqtona bağışlaya bilmir. Dövlət katibinin köməkçisi O'Brayenin artıq Vaşinqton-Bakı münasibətlərinin əvvəlki kimi ola bilməyəcəyi haqqında bəyanatı isə şəxsi təhqir kimi qəbul edilib.

Yaxın günlərdə ABŞ-ın ünvanına tənqid kampaniyasının davam edəcəyini və tənqidçi KİV-lərin və müxalifətin maliyyələşdirilməsi ilə Azərbaycanın daxili işlərinə müdaxilənin yeni "dəlillərinin" irəli sürüləcəyini ehtimal etmək olar.

Eyni zamanda, ictimai fəalların və ayrı-ayrı jurnalistlərin həbsinin davam edəcəyini gözləmək olar. 02B