Ermənistanla sülh müqaviləsi bağlanması üçün maneə yoxdur – İlham Əliyev

Bakı/22.11.23/Turan: Dövlət başçısı İlham Əliyevin Britaniyanın Avropa və Şimali Amerika üzrə dövlət naziri Leo Dokerti ilə görüşündə ikitərəfli münasibətlərin inkişafı məsələləri və regional məsələlər müzakirə olunub. 

Qonaq ölkəsinin regional sülh və sabitliyin təmin olunmasına hər hansı bir töhfə vermək işinə müsbət yanaşdığını deyib, "uzun illərdir Azərbaycan ilə çox mühüm siyasi, iqtisadi, ticarət və enerji əlaqələrinin" mövcudluğu ilə fəxr etdiklərini bildirib.

Onun sözlərinə görə, Azərbaycan yalnız Avropanın mühüm enerji təchizatçısı deyil, həm də Cənubi Qafqazın vacib, məsuliyyətli ölkəsidir.

Öz növbəsində, İlham Əliyev BP neft şirkətinin ikitərəfli münasibətlərin inkişafında və investisiya layihələrinin həyata keçirilməsində rolunu qeyd edib. Onun sözlərinə görə,  Bakı və London arasında siyasi əlaqələr yüksək səviyyədədir və Leo Dokertinin səfəri bu əlaqələrin inkişafı ilə bağlı məsələlər barədə fikir mübadiləsinin aparılması baxımından əhəmiyyət daşıyır.

Regiondakı vəziyyətə toxunan Əliyev Azərbaycan ilə Ermənistan arasında sülh müqaviləsinin imzalanması üçün artıq hər hansı əngəlin olmadığını deyərək ölkəmizin regional sülh gündəliyini dəstəklədiyini, sülh müqaviləsi və iki ölkə arasında münasibətlərin normallaşdırılması üçün Azərbaycanın Ermənistan ilə dialoqa hazır olduğunu vurğulayıb.

Buna cavab olaraq Dokerti Böyük Britaniyanın bu prosesi dəstəkləməyə hazır olduğunu bildirib. 02D