Vaqif Xaçatryan 15 il müddətinə azadlıqdan məhrum edilib /YENİLƏNİB/

Bakı/07.11.23/Turan: Bakı Hərbi Məhkəməsi Meşəli kəndində kütləvi qətllərdə ittiham olunan Vaqif Xaçatryanı 15 il müddətinə azadlıqdan məhrum edib. Məhkəmənin hökmünə görə, o, ilk beş ili qapalı həbsxanada, qalan müddəti isə ciddi rejimli koloniyada keçirəcək.

Hökm elan edilməzdən əvvəl vəkil Radmila Abılova hadisələr zamanı Xaçatryanın "evində olduğuna", "hadisələrdə iştirak etmədiyinə" əsaslanaraq ona "bəraət verilməsini" məhkəmədən xahiş edib.

Lakin dövlət ittihamçısı Cövdət Mehrəliyev deyib ki, Xaçatryanın Meşəli sakinlərinə hücum edən şəxslərin arasında olduğu şahidlərin və zərərçəkənlərin ifadələrilə təsdiqlənib.

Xaçatryan "sadəcə, Badara kəndinin sakini" olduğunu deyib. Allaha and içib ki, cinayət törətməyib və deyib ki, "qoy, Allah bu cinayətləri törədənləri cəzalandırsın".:) 06B

*   *   *

2023 Noyabr 07 (Çərşənbə axşamı) 10:40:19

Prokuror Vaqif Xaçatryanın 15 il müddətinə azadlıqdan məhrum edilməsini istəyib

Bakı/07.11.23/Turan: Noyabrın 7-də Bakı Hərbi Məhkəməsində Qarabağ ermənisi Vaqif Xaçatryanın işi üzrə proses keçirilib. Prosesə hakim Zeynal Ağayev sədrlik edib. Dövlət ittihamçısı yekun çıxışında Xaçatryanın ilk beş ili qapalı həbsxanada, qalan müddəti isə ciddi rejimli koloniyada qalmaqla, 15 il həbs cəzasına məhkum olunmasını istəyib.

Bundan sonra prosesdə fasilə elan edilib. Saat 14: 00-da iclas yenidən başlayacaq, vəkilin və müttəhimin yekun çıxışları olmalıdır.

* Vaqif Xaçatryan iyulun 29-da Ermənistana getmək istəyərkən "Laçın" sərhəd-keçid məntəqəsində saxlanılıb. Bundan öncə  22 dekabr 1991-ci il hadisələrilə əlaqədar Azərbaycanda başlanmış cinayət işi üzrə axtarışa verilmişdi. O vaxt  bir qrup silahlı erməni Xocalı rayonunun Meşəli kəndinə hücum etmişdi.  Xaçatryan və onun adamları  25 azərbaycanlını öldürüb, 14 nəfəri yaralayıb, 358 azərbaycanlını qanuni yaşayış yerlərindən didərgin salıb.

Xaçatryan Azərbaycan Cinayət Məcəlləsinin 103-cü (soyqırım) və 107-ci (əhalinin deportasiyası və ya məcburi köçürülməsi) maddəsilə təqsirləndirilən şəxs qismində cəlb edilib. Cinayət Məcəlləsinin həmin maddələrində ömürlük həbs cəzasına qədər uzunmüddəti həbs cəzaları  nəzərdə tutulur. Məhkəmədə o, günahını etiraf etməyib. 16B