Vəkil: Guya Faiq Əmirli imam olub, moizələr oxuyub� (YENİLƏNİB)

Avqustun 22-də Bakının Nəsimi rayon Məhkəməsi hakim Şəlalə Həsənovanın sədrliyi ilə “Azadlıq” qəzetinin yayım işləri üzrə direktoru, AXCP sədri Əli Kərimlinin köməkçisi Faiq Əmirli barəsində üç ay həbs qətimkan tədbiri seçib.

Faiq Əmirli avqustun 20-də saxlanılıb. O, Cinayət Məcəlləsinin 163-cü maddəsi (dini iğtişaşlar yaratmaq, yaymaq, öz dini üstünlüyünü başqalarına təlqin etmək və s.) ilə təqsirli bilinir.

Vəkil Aqil Layıcov Turan-a  müsahibəsində bildirib ki, Faiq Əmirli elə şeydə günahlandırlır ki, "mənim həqiqi gülməyim tutur".

“İndiyədək heç bir məhkəmə, istintaq  mənə bu qədər gülünc gəlməyib. Bu, iftiranın ifrat dərəcəsinə varmaq deməkdir. Guya Faiq Əmirli imamdı, guya moizələr oxuyub, bu moizələr də iğtişaşlara səbəb olub, dini nifrət doğurub, bunu da ictimai şəkildə edib. Bu ictimai şəkildə etməklə digər şəxslərin qarşısında üstünlük qazanmaq istəyib. Eyni zamanda, “Hizmət hərəkatı” ilə sıx bağlılığı olub. İttiham bundan ibarətdir”, deyə o qeyd edib.  

Vəkil məhkəmənin qərarından apellyasiya şikayəti veriləcəyini və sonra Avropa İnsan Hüquqları Məhkəməsinə  müraciət ediləcəyini bildirib.  

Layıcov Faiq Əmirlinin avtomobilindən tapılan Fətullah Gülənlə bağlı olan kitabların məhkəmədə nümayiş etdirilmədiyini deyib.

“Biz tələb etdik. Dedilər ekspertizaya təqdim edilib. Amma ekspertizaya təqdim edilmə qərarı olsa idi, bu qərarla biz də tanış olmalı idik. Belə qərar yoxdur. Görünür ”tapdıqları” kitabların gülüş doğuracağından çəkinirlər, ona görə məhkəmə qarşısına çıxarmırlar. Ola bilsin sabah kitabları başqası ilə əvəz edəcəklər”, deyə vəkil bildirib.

Faiq Əmirli isə məhkəmədə  deyib ki, "vaxtı ilə nənəm yuxusunda görüb ki, mən ya seyid, ya da imam olacağam. Məni nənəmin o zamanlar gördüyü yuxuya görə cəzalandırırsınız. Lap “Yuxu” filmindəki kimi”, deyə o, məhkəməyə istehza edib.  -03B-

2016 Avqust 22 (Bazar ertəsi) 17:00:28

Nəsimi Rayon məhkəməsi Azərbaycan Xalq Cəbhəsi Partiyası (AXCP) sədrinin köməkçisi və "Azadlıq" qəzetinin maliyyə direktoru Faiq Əmirov barəsində üç ay azadlıqdan məhrumetmə qətimkan tədbiri seçib.

Müdafiə tərəfi qərardan şikayət vermək niyyətindədir. -16D/06-

2016 Avqust 22 (Bazar ertəsi) 13:37:07

Şənbə günü saxlanılan Azərbaycan Xalq Cəbhəsi Partiyası (AXCP) sədrinin köməkçisi və “Azadlıq” qəzetinin maliyyə direktoru Faiq Əmirova qarşı CM-in 283-cü (milli, irqi və ya dini ədavətin salınması) və 168.1 (dini ibadətlərin keçirilməsi adı altında vətəndaşların hüquqlarına qəsd) maddələri ilə ittiham irəli sürülüb. Bu barədə Turan-a onun vəkili Aqil Layicov məlumat verib.

O, ittihamları “söz yığını” və tamamilə cəfəngiyyat adlandırıb.

İstintaq bildirir ki, F.Əmirovun avtomobilinin yük yerində türkiyəli din xadimi Fətullah Gülənin kitabları tapılıb. Əvvəla, kitablar F.Əmirovun deyil, onları ora qoyublar. İkincisi, bu kitablar Azərbaycanda qadağan edilməyib.

168.1-ci maddə üzrə ittiham isə gülüncdür, cünki F.Əmirov heç bir dini fəaliyyətlə məşğul olmayıb.

Bundan öncə F.Əmirov yalnız 48 saatlığa şübhəli şəxs qismində saxlanmışdı. Bu müddət 22 avqust saat 16:00-a yaxın bitir.

Demokratik Qüvvələrin Milli Şurasının sədri Cəmil Həsənli özünün Facebook səhifəsində yazır ki, F.Əmirovun avtomobilinin yük yerindən “tapılan” kitablardan biri “Gülənin İslam təlimi və humanizm anlayışı” adlanır. Bu kitab hakim partiyanın təsisçilərindən biri, mərhum professor, baş prokuror Zakir Qaralovun əmisi Zahid Qaralovun  redaktorluğu ilə nəşr olunub.

C.Həsənli xatırladır ki,  Bakıda Heydər Əliyevin anadan olmasının 90 illiyi ilə bağlı keçirilmiş kitab sərgisində Gülənin nəfis şəkildə nəşr olunmuş kitabları ən mötəbər yerdə qoyulmuşdu.

C.Həsənli qeyd edir ki, “Gülənçi” axtarmaq istəyənlər “Qafqaz” Universitetinin keçirdiyi tədbirlərin videoçəkilişlərinə baxıb görə bilər ki, YAP rəhbərliyi, Milli Məclis, Prezident Aparatı, ayrı-ayrı nazirliklərdən (ayrı-ayrı nazirlər də daxil olmaqla) hansı yüksək vəzifə sahibləri bu tədbirlərdə iştirakı özünün vəzifə borcu hesab edirdi.

Digər kitab isə türkiyəli jurnalist Mehmet Gündemin “Fətullah Gülənlə 11 gün” adlı kitabıdır. Kitabdakı məqalələrdən birinin müəllifi Azərbaycan Yazıçılar Birliyinin katibi, Mətbuat Şurası İdarə Heyətinin üzvü, “525-ci qəzet”in baş redaktoru Rəşad Məciddir.—06D--

2016 Avqust 20 (Şəmbə) 22:20:09

Şənbə günü saxlanılan Azərbaycan Xalq Cəbhəsi Partiyası (AXCP) sədrinin köməkçisi və “Azadlıq” qəzetinin maliyyə direktoru Faiq Əmirov (Əmirli) CM-in 283-cü maddəsilə (milli, irqi və ya dini ədavətin salınması) şübhəli qismində məsuliyyətə cəlb edilib. Bu barədə Turan-a onun vəkili Aqil Layicov məlumat verib.

Baş Prokurorluğun Ağır Cinayətlər üzrə İstintaq İdarəsində dindirmədən sonra F.Əmirovu Nərimanov Rayon Polis İdarəsinin müvəqqəti təcridxanasına göndəriblər. İstintaq 48 saat ərzində qərar qəbul etməlidir: ya F.Əmirova qarşı ittiham irəli sürməli, ya da onu azad etməlidir.

İstintaqın bildirdiyinə görə, F.Əmirovun maşınının yük yerində Fətullah Gülənin dini kitabları aparılıb.

F.Əmirov bildirib ki, saxlandıqdan sonra kitabları onun maşınına atıblar.

Vəkilin sözlərinə görə, həmin kitablar qadağan olunan ədəbiyyat sırasına aid deyil. Bundan əlavə, həmin kitablarda dini ədavətin təbliğinə dair heç nə yoxdur. Orada Allaha məhəbbət təbliğ edilir və düzgün, vicdanlı insan olmaq barəsində danışılır. Bundan əlavə, 283-cü maddə üzrə cinayət hərəkətlərinin əlamətləri onları açıq şəkildə və ya KİV-dən istifadə etməklə törətmək sayılır. Lakin vəkilin sözlərinə görə, F.Əmirov bunların heç birini etməyib.

“Azadlıq” qəzeti F.Əmirovun saxlanması ilə bağlı bəyanat yayıb.

“Bütün oxucularımıza, yerli və dünya ictimaiyyətinə bildiririk ki, “Azadlıq” qəzetinin özünün taleyi təhlükədədir. Repressiyaları durdurmaq üçün yubanmadan təsirli addımlar atılmalıdır.

“Azadlıq” qəzeti ən çətin şəraitdə də fəaliyyətini davam etdirəcək, sonuna qədər azad söz uğrunda mübarizəsinə sadiq qalacaq”, - bəyanatda deyilir.

Öz növbəsində AXCP lideri Əli Kərimli F.Əmirovun saxlanmasını müxalifətə qarşı repressiyalara haqq qazandırmaq üçün AXCP-ni Fətullah Gülənlə bağlamaq məqsədilə hakimiyyətin təxribatının bir hissəsi adlandırıb.

Ə.Kərimli qeyd edib ki, son günlər Azərbaycan və Rusiya KİV-də AXCP və şəxsən ona qarşı böhtan kampaniyası başlayıb.

“AXCP və şəxsən məni Gülənlə əlaqələndirməyə calışırlar”, - Ə.Kərimli vurğulayb.

Artıq AXCP fəalı Fuad Əhmədli də həbs edilib. Hüquq-mühafizə orqanları onu Gülənin tərəfdarı kimi təqdim ediblər.

“Bu gün Faiq Əmirlini tutublar. Guya onun maşınından Gülənin kitabları tapılıb. Bu, çox primitiv təxribatdır”, - Ə.Kərimli bildirib.—06D--

2016 Avqust 20 (Şəmbə) 12:29:56

Bu gün səhər “Azadlıq” qəzetinin maliyyə direktoru, AXCP fəalı Faiq Əmirov saxlanılıb. Bu barədə Turan-a AXCP sədr müavini Gözəl Bayramlı bildirib.

Onun sözlərinə görə, Əmirov 11:00 radələrində evindən mülki geyimli şəxslər tərəfindən aparılıb.

Hazırda Baş Prokurorluğun Ağır Cinayətlər üzrə İstintaq İdarəsinin əməkdaşları Əmirovun mənzilində axtarış aparırlar, deyə “Azadlıq” qəzeti xəbər yayıb.

Onun saxlanılmasının səbəbi məlum deyil. Hüquq-mühafizə orqanları hələlik məsələ ilə bağlı şərh vermir.

Qeyd edək ki, Əmirov həm də AXCP lideri Əli Kərimlinin ən yaxın mübarizə yoldaşlarındandır.

“Əmirova qarşı hansı ittiham irəli sürülürsə sürülsün, bu, əsassız olacaq. Baş verənlər şəxsən mənə və partiyaya qarşı yönəlmiş sürətli repressiya kampaniyasının bir hissəsidir”, deyə AXCP lideri Əli Kərimli Turan-a bildirib.

Saat 13:30 radələrində Əmirovun mənzilində axtarış başa çatıb, bundan sonra müstəntiqlər onun avtomobilində axtarışa başlayıb.

Yaxınlarının sözlərinə görə, mənzildə heç nə tapılmayıb. Bu arada, müstəntiqlər toy disklərini və qəzetin nəşri ilə bağlı sənədləri götürüblər.

Prokurorluq nümayəndələri hər-hansı izahat verməyib. Onlar vəkilin gəlməsini gözləməkdən də imtina edərək, axtarışın “təcili” olduğunu bildiriblər. Bu zaman onlar Baş Prokurorluğun Ağır Cinayətlər İdarəsinin rəisi Eldar Əhmədovun imzası olan sanksiya göstəriblər.  -06В-