Vəkil : qərardan apellyasiya şikayəti veriləcək (YENİLƏNİB)

Məhkəmədən sonra Mehman Əliyevin vəkili Fuad Ağayev AzadlıqRadiosu-na bildirib ki, girov qətimkan tədbiri ilə bağlı vəsatət qanunvericiliyə uyğun hazırlanmışdı. Müdafiəçinin sözlərinə görə, vəsatətdə yetərincə əsaslar da vardı, amma məhkəmə nəzərə almadı: "Böyük ictimai təhlükə törətməyən və az ağır cinayətlərdə ittiham olunan şəxslər haqqında girov qətimkan tədbiri seçilə bilər. Vəsatətdə göstərmişdik ki, Mehman Əliyev heç vaxt cinayət məsuliyyətinə cəlb olunmayıb. Daimi yaşayış yeri, iş yeri bəllidir və Bakıdadır. Onun öhdəsində üç nəfər adam var - övladı, həyat yoldaşı və 90-a yaxın yaşı olan atası. Əfsuslar olsun ki, bütün bunlar nəzərə alınmadı və vəsatətimiz təmin olunmadı".
Vəkil bildirib ki, qərardan apellyasiya şikayəti veriləcək. Əgər Bakı Apellyasiya Məhkəməsi də şikayəti təmin etməsə, bu işi Avropa Məhkəməsinə göndərəcəklər.

Mehman Əliyev özü də məhkəmədə çıxış edib. Girov qətimkan tədbirinin seçilməsi ilə bağlı vəkilinin vəsatətini müdafiə edən Mehman Əliyev bildirib ki, həbsindən əvvəl də dəfələrlə şifahi şəkildə istintaqa çağrılıb və hər dəfə də gedib ifadə verib. Həbs olunan gün də istintaq orqanına onu telefon zəngi ilə çağırıblar.

"Çağıranda demişdilər ki, ona bir neçə sualları var. Görünür, həmin o bir neçə suala hələ də cavab alırlar", - Fuad Ağayev bildirib.

* * *

2017 Sentyabr 06 (Çərşənbə) 17:49:22

Məhkəmə Mehman Əliyevi həbsdə saxlayıb (xəbər yenilənir)

Bakı/06.09.2017/Turan: 2017-ci il sentyabrın 6-da Yasamal rayon məhkəməsi müdafiə tərəfin Turan İnformasiya Agentliyinin direktoru Mehman Əliyevin girov müqabilində azadlığa buraxılması haqqında vəsatətini təmin etməyib.

Vəkil Fuad Ağayev qeyd edib ki, məhkəmənin qərarından apellyasiya şikayəti veriləcək.

* Mehman Əliyev avqustun 24-də saxlanılıb. Növbəti gün ona qarşı CM-in 213.1 (vergi ödənişindən yayınma), 308.1 (vəzifə səlahiyyətlərindən sui-istifadə) və192.2-ci (böyük gəlir əldə etməklə qanunsuz sahibkarlıq) maddələri ilə ittiham irəli sürülüb. Məhkəmə onun barəsində noyabrın 7-nə qədər həbs qətimkan tədbiri seçib. Əliyev bütün ittihamları rədd edib və siyasi motivli adlandırıb.

Beynəlxalq təşkilatlar Əliyevin həbsini pisləyib və onu dərhal azad etməyə çağırıb. ABŞ Dövlət Departamenti Mehman Əliyevi dərhal azad etməyə çağırıb. Fransa və Böyük Britaniya XİN də Əliyevin həbsindən narahatlıq ifadə edib və Azərbaycan hakimiyyətini insan hüquqları sahəsində beynəlxalq öhdəliklərinə riayət etməyə çağırıb. -06B-