Vəkillər Avropa İnsan Hüquqları Məhkəməsindən “Abzas Media”nın informasiya mənbələrini qorumağı xahiş edirlər

Bakı/23.11.23/Turan: “Abzas Media” onlayn nəşrinin direktoru və baş redaktoru Ülvi Həsənli və Sevinc Vaqifqızının vəkilləri məhkəmə  reqlamentinin 39-cu qaydasına uyğun olaraq Avropa İnsan Hüquqları Məhkəməsinə müraciət ediblər. Bu norma müraciətə prioritet qaydada baxmağa imkan verir, vəkil Elçin Sadıqov Turan-a bildirib.

Müraciətin səbəbi məhkəmənin qərarı olmadan “Abzas Media”ya məxsus kompüter və telefonların götürülməsidir.

Vəkilin sözlərinə görə, bu daşıyıcılardakı məlumatlardan jurnalist araşdırmalarının mənbələrini təqib etmək üçün istifadə oluna bilər.

Odur ki, Avropa İnsan Hüquqları Məhkəməsinə müraciətdə ehtimal olunan informasiya mənbələrinin təqib edilməsini hökumətə  qadağan etmək və götürülmüş avadanlığı sahiblərinə qaytarmaq xahiş edilir.

"Ümid edirik ki, Avropa İnsan Hüquqları Məhkəməsi bu gün və ya sabah Həsənli və Vaqifqızı hüquqlarının müdafiəsilə bağlı qərar qəbul edəcək, onların həyatını və mənbələrinin təhlükəsizliyini qoruyacaq", - vəkil deyib.

Vəkil bu gün təcridxanada Vaqifqızı ilə görüşüb.

Onun sözlərinə görə, jurnalist ruh yüksəkliyini saxlayır, yolundan dönməyəcəyini bildirib, doğmalarına, dostlarına və həmkarlarına salamlarını göndərib. – 06B