Vəkillər: Məhkəmə Leyla və Arif Yunusların günahını sübut edən dəlil təqdim etməyib (YENİLƏNİB)

Arif Yunusun 9 il müddətinə həbs olunması barədə prokurorun təklifi tamamilə əsassızdır. Bunu A.Yunusun vəkili Əfqan Məmmədov prokuror Fərid Nağıyevin bugünkü çıxışını şərh edərkən deyib.

O, jurnalistlərlə söhbətində bildirib ki, dövlət ittihamçısının yekun çıxışında yeni heç nə olmayıb və prokuror mahiyyətcə ittihamnaməni təkrar edib.

Prokuror A.Yunusun cinayətinin nədən ibarət olduğunu açıqlamayıb. Belə ki, onu dələduzluqda ittiham edərkən istintaq cinayət obyektini açıqlamayıb – A.Yunus kimin vəsaitini mənimsəyib, kimin etibarından sui-istifadə edərək onu aldadıb?

İttihamın bütün mahiyyəti ondan ibarət olub ki, A.Yunus pullarını özünün bir hesabından başqa bir hesabına köçürüb.

Digər bir cinayət isə odur ki, A.Yunusun xaricdə yaşayan qardaşı onun mənzil alması üçün pul verib. “Bunun nəyi cinayətdir?”, - vəkil qeyd edib.

O deyib ki, 24 şahidin heç biri A.Yunusun əleyhinə ifadə verməyib.

Öz növbəsində L.Yunusun vəkili Ramiz Məmmədov prokurorun çıxışı ilə razı olmadığını bildirib.

Müdafiə tərəfi yekun sözdə öz fikrini bildirəcək. Onun sözlərinə görə, müdafiə tərəfi yekun çıxışın hazırlanması üçün 10 gün vaxt istəyib, lakin məhkəmə cəmi 3 gün vaxt verib.

Müttəhimlərin vəkilləri onların bəraət   almasına nail olmaq niyyətindədir.

Xatırladaq ki, bu gün prokuror L.Yunusun 11, A.Yunusun 9 il azadlıqdan məhrum edilməsini istəyib.—03C06--

2015 Avqust 06 (Cümə axşamı) 12:33:19

Hüquq müdafiəçisi Leyla Yunus və onun həyat yoldaşı Arif Yunusun işi üzrə məhkəmədə prokuror Fərid Nağıyev çıxış edib. O, məhkəməni L.Yunusu  11, A.Yunusu isə 9 il müddətinə azadlıqdan məhrum etməyə çağırıb, onları dələduzluq, vergidən yayınma və sui-istifadədə təqsirli bilib.

Proses avqustun 10-da vəkillərin çıxışı ilə davam edəcək. -1606D-

2015 Avqust 06 (Cümə axşamı) 11:04:41

Avqustun 6-da Bakı Ağır Cinayətlər Məhkəməsində Leyla və Arif Yunusların məhkəməsi davam edib.

Əvvəlki günlərdə olduğu kimi, bu dəfə də məhkəmə administrasiyası müstəqil mətbuatın və demokratik ictimaiyyətin nümayəndələrini zala buraxmayıb. Bundan əlavə, bu gün qərb diplomatlarının da girişi məhdudlaşdırılıb. Belə ki, prosesdə yalnız ABŞ, Böyük Britaniya və Fransa diplomatik missiyalarının nümayəndələri iştirak ediblər. Avropa İttifaqı, Hollandiya və Almaniya təmsilçiləri zala buraxılmayıb  və bu, qərb diplomatlarının etirazına səbəb olub.

Proses başlandıqdan yarım saat sonra Arif Yunusun vəziyyəti kəskin pisləşib və o, huşunu itirib. Bu barədə Turan-a onların vəkili məlumat verib. Bununla əlaqədar hakim yarım saat fasilə elan edib və həkim çağırıb. Lakin saat 10:30-dək həkim  gəlməyib.

“Səhərdən Arifə iki dəfə iynə vurulub. Lakin kömək etməyib, o, məhkəmə zalında huşunu itirib. Arif başını həyat yoldaşının dizlərinə qoyaraq gözüyumulu vəziyyətdə uzanıb”, - vəkil Ramiz Məmmədov bildirib.-03В-