Vətəndaş cəmiyyəti: korrupsiyasız bərpa işləri

Bakı/30.12.20/Turan: Ermənistanın işğalında olan vətən torpaqlarının böyük hissəsi ordumuzun 44 günlük uğurlu hərbi əməliyyatları nəticəsində azad edildi. 

Hazırda Azərbaycan öz hərbi qələbələrini beynəlxalq ictimai rəydə siyasi-diplomatik gedişləri ilə möhkəmləndirmək istiqamətində yeni və mürəkkəb mərhələyə qədəm qoyub.

Bu mərhələdə demokratik cəmiyyət quruculuğu, vətəndaş iştirakçılığının genişləndirilməsi, idarəetmənin səmərəliliyinin artırılması, korrupsiya ilə effektli mübarizə dövlətin siyasi gücünü artıra və beynəlxalq imicini yüksəldə bilər.

İşğaldan azad edilən yaşayış məskənlərinin bərpası prosesində sosial ədələtin təmini və korrupsiya hallarına yol verilməməsinin vacibliyini qeyd edərək, ölkəmiz üçün yaranmış mövcud şəraiti dəqiq dəyərləndirmək və zəruri işləri həyata keçirmək istiqamətində peşəkar çalışmalara ciddi ehtiyac yaranıb.

1.İşğaldan azad edilmiş ərazilərin bərpa prosesində bu məskənlərimizin özünəməxsus tarixi aurasının, tarixi memarlıq ənənələrinin və abidələrinin qorunub saxlanılmasına;

2.Əhaliyə dəyən maddi zərərin miqyasının obyektiv araşdırılması və onlara konpensasiyanın ödənilməsində ədalət prinsiplərinin gözlənilməsinə; 

3.Kommunikasiyaların və kommunal təsərrüfatın bərpası üçün nəzərdə tutulan layihələrin effektliliyinə və dövlət vəsaitlərinin səmərəli xərclənməsinə;

4.Bərpa olunmuş yaşayış məskənlərinə əhalinin köçürülməsində, habelə, inzibati-siyasi, humanitar və  texniki-təchizat problemlərinin həlli ilə bağlı layihələrin icrasında hesabatlılığa və şəffaflığa;

İctimai nəzarətin, müzakirələrin, diskussiyaların və monitorinqlərin təşkili, habelə, müvafiq təkliflərin hazırlanması, hökumət qurumlarına və ictimaiyyətə təqdim edilməsi niyyəti ilə Sivil Toplumun açıq vətəndaş təşəbbüsü ilə çıxış etməyə qərar verdik. 

Sivil Toplumun nümayəndəsi, siyasi təhlilçi Nəsimi Məmmədlinin verdiyi məlumata görə təşəbbüsü ölkənin tanınmış vətəndaş cəmiyyəti nümayəndələri irəli sürüb. Təşəbbüsçülər barəsində daha geniş məlumat yaxın vaxtlarda ictimaiyyətə təqdim ediləcək.—0—