Ölkə mediası nədən yazır? (media-icmalı) 30.12.20

“Azərbaycan” qəzeti “Pandemiyadan zərərçəkmiş sahibkarlara yenidən maliyyə dəstəyi göstəriləcək məqalədə COVİD-19 pandemiyasının vurduğu zərərlə bağlı sahibkarlara göstərilən dəstək qiymətləndirilir. 

Müəllif vurğulayır ki, Nazirlər Kabinetinin 2020-ci il 23 dekabr tarixli sərəncamına uyğun ölkədə karantin rejiminin sərtləşdirilməsi ilə bağlı sahibkarlıq subyektlərinə yenidən maliyyə dəstəyi göstəriləcək.

Müəllifin Dövlət Vergi Xidmətinə istinadən deməsinə görə, sahibkarlara maliyyə dəstəyi iki istiqamət üzrə aparılacaq.

Birinci istiqamət pandemiyadan zərərçəkmiş sahələrdə çalışan muzdlu işçilərin əməkhaqqının müəyyən hissəsinin ödənilməsini nəzərdə tutur. Bunun üçün 22 minə yaxın vergiödəyicisini əhatə edəcək bu tədbir çərçivəsində pandemiyanın zərərçəkmiş sahələrində çalışan 200 min nəfərdən çox muzdlu işçinin əməkhaqlarının müəyyən hissəsi ödəniləcək.

Bu məqsədlə sahibkarlara dövlət tərəfindən 52,5 milyon manat həcmində maliyyə dəstəyi göstərilməsi nəzərdə tutulur.

İkinci istiqamət isə pandemiyadan zərərçəkmiş sahələrdə fəaliyyət göstərən fərdi (mikro) sahibkarlara maliyyə dəstəyidir. Bu tədbir pandemiyadan zərərçəkmiş sahələrdə sahibkarlıq fəaliyyəti ilə məşğul olan 90 minə yaxın fərdi sahibkara dövlət tərəfindən 30,5 milyon manat həcmində maliyyə dəstəyinin göstərilməsini nəzərdə tutur.

Müəllifin deməsinə görə, sahibkarlara yenidən maliyyə dəstəyinin göstərilməsi barədə qərar yaranmış vəziyyətdə sahibkarlıq subyektlərinin zərərlərinin azaldılmasına, onların maliyyə vəziyyətinin yaxşılaşdırılmasına, iş yerlərinin qorunub saxlanılmasına xidmət edir.

“Redaktor.az” saytı isə “Erməni təxribatı: Yeni müharibə başlayır? – düşmən odla oynayır” sərlövhəli məqalədə dekabrın 27-də Xocavənd rayonunda baş vermiş terror hadisəsini diqqət mərkəzinə çəkir.

Müəllif yada salır ki, dekabrın 27-də Xocavənd rayonunda  6 nəfərlik erməni silahlı terrorçu qrupu Azərbaycan Ordusunun bölmələrinə hücum edib, nəticədə Azərbaycanın bir nəfər hərbi qulluqçusu şəhid olub, bir hərbçi isə yaralanıb.  Terrorçu dəstənin isə altı üzvü məhv edilib.

Müəllif  belə təxribatların davamlı olması ilə yenidən müharibənin başlaya bilməsi mümkünlüyü sualını gündəmə gətirir.

Politoloq Tofiq Abbasov isə deyir ki, Ermənistan müharibə edəcək gücdə deyil: “Ermənistanın müharibə etməyə nə silahı, nə də ordusu var. Onlar özləri də bunu yaxşı bilir. Bu baxımdan, düşünmürəm ki, Ermənistan tərəfi vəziyyəti müharibəyə qədər gərginləşdirsin”.

Bununla belə, politoloq bəzi erməni dairələrinin elan etdiyi partizan müharibəsinin fəallaşmasını da istisna etmir. Onun fikrincə, Qarabağda baş verənlər də partizan dəstələrinin işidir, amma Azərbaycan dövləti bütün bu təxribatların qarşısını alır və bundan sonra da alacaq Odur ki,  Azərbaycan hər bir halda istənilən vəziyyətə hazırdır.

“Yenisabah.az” saytı  isə “Çindən vaksin almaq olar? - “Qorxmaq lazım deyil” sərlövhəli məqalədə koronavirus infeksiyası əleyhinə hazırlanmış vaksinlərin effektivliyini dəyərləndirir.

Müəllif deyir ki, koronavirusla mübarizə üçün Çində “Sinovac” vaksini hazırlanıb, kliniki sınaqlardan uğurla keçən vaksini dünyada 100-dən çox ölkə sifariş verib.

Eyni zamanda vurğulanır ki, İndoneziya və Türkiyə indiyədək peyvəndin ən yüksək effektivlik faizini qeydə alan ölkələr olub və istehsalçı “Sinopharm” şirkətinin açıqlamasına görə, sifarişləri təmin etmək üçün artıq 500 milyon doza vaksin istehsal olunub.

Professor Adil Qeybulla isə hesab edir ki, Azərbaycan daha çox təhlükəsiz vaksinlərin alınmasında maraqlı olmalıdır, çünki ortada genofondun təhlükəsizliyi kimi məsələ var.

Çində hazırlanmış vaksinə gəlincə, professor əlavə edir ki, o baxımdan vaksini yoxlamaq lazımdır: “Əgər həqiqətən keyfiyyətlidirsə onda almağa dəyər, vaksindən qorxmaq lazım deyil.

Bu zənciri qırmaq, prosesi lokallaşdırıb itkiləri azaltmaq üçün risk qrupuna aid şəxsləri, ilk növbədə tibbi personalı vaksinasiya etmək lazımdır”, -professor bildirir. O, həm də xəbərdarlıq edir ki. vaksinasiya hələ pandemiyanın sonu demək deyil, insanlar yenə də özlərini qorumalıdırlar,

Professor deyir ki, əgər “Sinovaç” kifayət qədər fayda veribsə, istifadəsində problem olmaz.

“Bizimyolinfo.az”  saytı isə “Qarabağda yeni savaş qığılcımları –antiterror əməliyyatının zamanı gəlib” sərlövhəli məqalədə işğaldan azad edilən  ərazilərdə vəziyyəti qiymətləndirir.

Müəllif deyir ki, Rusiya Laçın dəhlizi vasitəsilə Ermənistan Silahlı Qüvvələrini Şuşanın ətraf kəndlərində, Xocavənd və Ağdərədə yerləşdirir.

Müəllifin iddiasına görə, erməni hərbiçilər məhz Rusiya "sülhməramlı" qüvvələrinin müşayiətilə Laçın dəhlizindən keçərək Azərbaycan ərazisinə daxil olur.

Müəllif  əlavə edir ki, Dağlıq Qarabağ separatçılarından Vitali Balasanyan yeni təhlükəsizlik bölmələri və silahlı qüvvələr hazırlayacaqlarını vurğulayır, bununla da yeni müharibə siqnalını verir.

Müəllifə görə, Rusiya Ermənistandan yeni hərbi qüvvələrini gətirib Dağlıq Qarabağda yerləşdirməklə Ermənistan Azərbaycan arasında sülh müqaviləsinin bağlanmasına imkan vermək istəmir  və aşağıdakı məqsədi güdür: “Qarabağ münaqişəsini bir neçə ildən sonra yenidən qızışdırmaq, Qarabağın statusunu açıq saxlamaq, Azərbaycana təzyiq etmək, azərbaycanlıların nəzərdə tutulan Xankəndi və digər ırazilərə köçürülməsinin qarşısını almaq”.

Müəllif hesab edir ki, antiterror əməliyyatlarının aparılmasına hüquqi zəmin yaranıb, bu, xüsusilə Xankəndi şəhərinə aiddir, çünki “terrorun başı” oradadır.

Müəllif  deyir ki, Ermənistan və Rusiya öhdəliklərini yerinə yetirə bilmirlərsə, o zaman Laçın dəhlizi də qapadılmalı, sülhməramlılar isə yalnız Ermənistan-Azərbaycan sərhəddində müşahidə aparmalıdırlar: “İndidən bu prosesin qarşısı alınmasa, yeni müharibə mümkündür. Azərbaycan hərbçilərinə hücumlar və itki verməyimiz antiterror əməliyyatlarına başlamağımıza hüquqi haqq verir”.