Vətəndaşlıq haqqında qanuna mürtəce düzəlişlər

Bu gün Milli Məclis “Azərbaycan Respublikasının vətəndaşlığı haqqında” qanuna əlavə və dəyişikliklər edib.

10-cu maddəyə 2-ci hissə əlavə edilib. Əlavəyə görə, başqa dövlətin vətəndaşlığını qəbul etmiş Azərbaycan vətəndaşı 1 ay ərzində bu barədə müvafiq icra hakimiyyəti orqanına yazılı məlumat verməlidir. Bu tələbin yerinə yetirilməməsinə görə cinayət məsuliyyəti nəzərdə tutulur (hansı icra hakimiyyəti orqanından söhbət getdiyi dəqiqləşdirilmir).

12-ci maddənin məzmunu da dəyişdirilib. Yeni redaksiyada deyilir ki, Azərbaycan ərazisində dünyaya gələn uşağın hər iki valideyni əcnəbidirsə, o, Azərbaycan vətəndaşı hesab olunmayacaq.

Valideynlərdən biri əcnəbi, digər vətəndaşlığı olmayan şəxsdirsə, uşaq Azərbaycan vətəndaşı hesab edilməyəcək.

Lakin hər iki valideyn vətəndaşlığı olmayan şəxsdirsə, uşaq Azərbaycan vətəndaşıdır.

Həmçinin qanunun 18-ci maddəsinə (Azərbaycan vətəndaşlığının itirilməsi) dəyişiklik edilib. Yeni redaksiyada Azərbaycan vətəndaşlığının itirilməsi halları ilə bağlı siyahı genişləndirilib.

Əvvəlki redaksiyada vətəndaşlığın qəbulu zamanı qəsdən tələb olunan məlumatları saxtalaşdıran və ya saxta sənədlər təqdim edən şəxs vətəndaşlıqdan məhrum edilirdi.

Yeni redaksiyada aşağıdakı hallar da Azərbaycan vətəndaşlığının itirilməsi üçün əsas olacaq: könüllü olaraq başqa dövlətin vətəndaşlığının qəbul edilməsi; AR vətəndaşının xarici dövlətin dövlət və ya bələdiyyə orqanlarında, silahlı qüvvələrində və ya başqa silahlı birləşmələrində könüllü xidmət etməsi; AR vətəndaşının dövlətin təhlükəsizliyinə ciddi ziyan vuran davranışı.

Bugünki müzakirələr zamanı parlamentin hüquq siyasəti və dövlət quruculuğu komitəsinin sədri Əli Hüseynli bildirib ki, bu qanunun normanları artıq xarici dövlətlərin vətəndaşlığını qəbul etmiş şəxslərə şamil edilmir, belə ki, qanunun geriyə təsiri yoxdur.

Onun sözlərinə görə, dəyişikliklərə qanunvericiliyi dəqiqləşdirmək və mövcud boşluqları doldurmaq məqsədi daşıyır, belə ki, Azərbaycan Konstitusiyası ikili vətəndaşlığa yol vermir. -06D-