Slavyanskdakı Ahıska türkləri Azərbaycana köçürlər

Ukraynanın şərqindəki Slavyansk şəhərində gedən döyüşlərlə bağlı buradakı Ahıska türkləri evlərini tərk etmyə məcbur olurlar. Bu xəbəri Türkiyə saytları yayıblar.

Ahıska türklərinin Ukrayna üzrə “Vətən” cəmiyyətinin təmsilçisi Nəbican Basatov Slavyansk şəhərini indiyə kimi 700-ə yaxın Axıska türkünün tərk etdiyini nəzərə çatdırıb.

N.Basatov evlərini tərk etməyə məcbur olan Ahıska türklərinin Donetskdə bir məscidə sığındıqlarını, bundan sonra hara gedəcklərini bilmədiklərini vurğulayıb. 

Slavyanskda yaşamağın təhlükəli olduğu, bu səbəbdən Ahıska türklərinin daha təhlükəsiz bölgələrə getməyə məcbur olduqlarını bildirəə N.Basatov bu şəxslərin Rusiyaya və Azərbaycana köçdüklərini qeyd edib.

O, bir çox Ahıska türklərinin maddi sıxıntılar üzündən təhlükəsiz bölgəni tərk edə bilmədiklərini, evlərinin zirzəmilərində yaşamağa məcbur olduqlarını söyləyib.

Slavyanskda döyüşlərin günbəgün şiddətləndiyini bildirən N.Basatov döyüşlərin qısa zamanda bitəcəyinə inanmadığını deyərək, Türkiyənin Ahıska türklərinə sahib çıxmasını və yardım əli uzatmasını istədiklərini nəzərə çatdırıb.

Ahıska türklərinin Azərbaycan üzrə “Vətən” bölməsindən “Turan”a Ukraynadan Azərbaycana Ahıska türklərinin gəlməsi haqda məlumata malik olmadıqları bildirilib. Bu haqda infromasiyaları ancaq internet saytlarından oxuduqlarını nəzərə çatdırıblar. -05D-