VHP MSK-nın qərarını kəskin şəkildə pislədi

Vətəndaş Həmrəyliyi Partiyası (VHP) 50 saylı Abşeron-Qobustan seçki dairəsi komissiyasının formalaşdırılmasında yol verilən qanunsuzluqlara etiraz bəyanatı yayıb.

Bu seçki dairəsi əvvəllər fəaliyyət göstərmiş Qobustan-Xızı seçki dairəsi bazasının əsasında yaradılıb.

Sənəddə dairə seçki komissiyasının tərkibi formalaşdırılarkən parlament azlığını təmin edən partiyaların razılığına uyğun olması nəzərə çatdırılır. 2010-cu il parlament seçkilərindən bu yana 50 saylı seçki dairəsində DSK üzvü kimi VHP təmsilçisi olub. Yeni seçkilər keçirilmədiyi üçün dairə seçki komissiyasının 2010-cu il parlament seçkilərindən sonrakı tərkibdə qaldığı nəzərə çatdırılır.

Müəlliflər qeyd edirlər ki, ad dəyişikliyilə bağlı DSK formalaşdırılarkən Mərkəzi Seçki Komissiyası (MSK) VHP-nin yox, Abşeron rayon icra hakimiyyətinin hazırladığı siyahını və Sosial Rifah Partiyasından (SRP) olan namizədin namizədliyini dəstəkləyib. “Bu, ilk növbədə, yerli icra hakimiyyətinin seçki orqanına kobud müdaxiləsi və böyük qanun pozuntusudur”, deyə sənəddə baş verən hadisəyə qiymət verilir.

Sənəddə icra hakimiyyətinin hazırladığı siyahını təsdiqləməklə MSK-nın növbəti qanunsuzluğa imza atmış olduğu, bu dairədə seçkilərin nəticəsinin obyektivliyinin indidən şübhə altına düşmüş olduğu vurğulanır.

VHP MSK-nın bu qərarını kəskin şəkildə pisləyir, rəsmi Bakıdan seçki orqanının işinə müdaxilə edən icra strukturunun əməlinə qiymət verməyi, qanunun qorunması üçün addımlar atmağı tələb edir. -05D-